Read cisena MASALIMO 49 Bible Online

MASALIMO 49 - cisena bible

MASALIMO 49

¹Kuna nyakutchemula nyimbo. Salimo ya nkhonda Kora. Vani ipi, imwe anthu onsene! Veserani, imwe anthu a padziko yonsene yapansi,

²mkulu penu mwana, anyakutcherenga na anyakufuma ene.

³Manyerezero anga anakhala akuveka; ndinalonga mafala anzeru.

⁴Ndinaikha khutu kuna miyambi; ndinafuthula nthanthi pinaimba ine na nyakatangale wanga.

⁵Ine nkhabe gopa tayu pandzidzi wakugoswa ndingazungulirwa na anyamalwanga,

⁶na anthu akuipa ambanyindira mfuma yawo ale mbadungudza na kuinjipa kwa mfumawo.

⁷Munthu nkhabe kwanisa kupiombola yekha ene tayu; iye nkhabe kwanisa kupagali Mulungu konta ya moyo wache tayu,

⁸thangwi konta ya moyo wa munthu njikulu pyakwanga. Pikhafuna iye kukwanisa kupagali nee mbapidakwana tayu

⁹kuti iye aleke kufa, kuti akhale na moyo okhonda mala.

¹⁰Munthu onsene anakwanisa kuona kuti podi na anthu ene anzeru zawo ambafa basi, ninga mumbachitirambo anthu akupupwa na akudzedzeduka. Iwo ambasiyira pidzukulu pyawo mfuma zawo zonsene.

¹¹Masiye[34] awo ndiye misawo kwenda na kwenda; kweneko ambakhala ndzidzi onsene, podi kwene kuti iwo pakutoma akhali na mbuto yawo ene.

¹²Ukulu wa munthu nkhabe kwanisa kumpulumusa kuimfa tayu; iye anafa basi ninga nyama.

¹³Yang'anani pimbachitikira anthu ambapinyindira okha ene ale, kumala kwa anthu[35] ambakwana nayo mfumawo nee funave pinangobi.

¹⁴Kumala kwa moyo wawo nkhwenda kudziko ya anyakufa ninga mabira, pontho imfa ndiye inafuna dzakhala makabuswawo. Anyakulungama anaatonga na machibese; manungo awo anavunda kudziko ya anyakufa kutali na misawo.[36]

¹⁵Mbwenye Mulungu anandiombola; iye anandipulumusa kumphamvu za dziko ya anyakufa; iye anati andiendese kuna iye ene.

¹⁶Lekani ipirwa napyo munthu angafuma, ngakhala mfumache ikwenda mbikula pikulu pene;

¹⁷thangwi iye nkhabe dzakwata mfumache angafa tayu; iye nkhabe dzaenda na chinthu chibodzi chene kumasiye tayu.

¹⁸Podi munthu apisanzayise tani m'moyo wache, pontho kukuzwa thangwi pinthu pikumfambira mwadidi,

¹⁹iye anati afe basi ninga mudachitira makolo ache, kule kuna mdima okhonda mala.

²⁰Ukulu wa munthu nkhabe kumpulumusa kuimfa tayu; iye anafa basi ninga nyama.