Read cisena MASALIMO 50 Bible Online

MASALIMO 50 - cisena bible

MASALIMO 50

¹Salimo ya Asafu. Mulungu Wamphamvu zonsene, MBUYA, ambalonga; iye ambachemera dziko yonsene yapansi kubulukira kumabulukiro dzuwa kufikirana kumadokero dzuwa.

²Kubulukira ku Zioni, mzinda wadidi wakubalika, Mulungu ambaonesa cheza.

³Mulungu wathu akubwera, nee akudza mwakumatama tayu; moto wakuchita kunyeka uli patsogolo pache, chonzi chikulu chamzungulira.

⁴Iye ambachemera kudzulu na pansi ninga mboni kuti aone pinatonga iye mseru anthu ache.

⁵Iye ambalonga kuti, “Gumanyisani chifupi na ine anthu anga akukhulupirika, ale adachita na ine chiverano pakupereka nsembe.”

⁶Kudzulu kumbalonga kuti Mulungu ngwakulungama, kuti iye ene mwenechiro ndiye nyakutonga miseru.

⁷“Veserani kuno, anthu anga, pontho ndinati ndilonge; ndinati ndichite umboni wakupokanyisana na imwepo, Aisraele. Ine ndine Mulungu, Mulungu wanu.

⁸Ine nee ndikukusumululani tayu thangwi ya nsembe zanu, penu nsembe zanu zakupyerera zimbadza na imwe kuna ine ndzidzi onsene.

⁹Pontho ine nkhabe funa ng'ombe zimuna zakubulukira m'thanga mwanu, penu mbuzi zakubulukira pa mikumbi yanu tayu;

¹⁰nyama zonsene za mumsitu nsanga, pontho na ng'ombe zene za pamapiri pikwi-pikwi.

¹¹Mbalame zonsene zam'tsanga nsanga, pontho na nyama zonsene zam'tsanga m'maphedi.

¹²“Mbandidakhala na njala, nee mbandidakupemphani kudya tayu, thangwi dziko yapansi na pyonsene pili mwenemo mphyanga.

¹³Kadi ine ndimbadya nyama ya ng'ombe imuna, penu kumwa chiropa cha mbuzi?

¹⁴Kupereka takhuta kukhale nsembe yanu kuna Mulungu,[37] pontho perekani kuna Nyakudzulu-dzulu pyonsene pidadumbira imwe kuna iye pile.

¹⁵Ndichemereni nyatwa zingadza, ndinati ndikupulumuseni, pontho imwe munati mundikuze.”

¹⁶Mbwenye Mulungu adalonga kuna anyakudawika mbati, “Thangwi yache ninji mumbalalika mwambo wanga? Thangwi yache ninji mumbalonga pya chiverano changa?

¹⁷Imwe mumbakhonda kuti ndikulangeni; mumbakhonda matongero anga.

¹⁸Imwe mumbasanduka shamwali wa mbava yonsene inaona imwe ile, pontho mumbaphatizana na anyakuchita pyauputa.

¹⁹“Ndimwe akusasanyika kulonga pinthu pyakuipa; imwe nkhabe dembuka na kulonga pyakunama tayu.

²⁰Imwe mumbasasanyika kusumira abale anu ene, pontho na kuasakira mathangwi.

²¹Imwe mwachita pinthu pyonsenepi, kwache sidalonge chinthu na chibodzi chene tayu, natenepo imwe mudanyerezera kuti ine ndikhali ninga imwe. Mbwenye lero ndikukusumululani, pontho kukuonesani pakwecha mseru wanu.

²²“Nyerezerani ipi imwe anyakundiduwalira, gopesera ndinakuvungani, pontho nkhabe unango anakukupulumusani.

²³Kupereka takhuta ndiye nsembe ikulu imbandilemedza; ndimomwene kuti ndinaapulumusa anyakundivera onsene.”