Read cisena MASALIMO 51 Bible Online

MASALIMO 51 - cisena bible

MASALIMO 51

¹Kuna nyakutchemula nyimbo. Salimo ya Davite, pidamala iye pangwa na mprofeti Natani pyauputa udachita iye na Batesheba. Ndiverenimbo nsisi, Mulungu, thangwi ya kundifuna kwanu kokhonda mala. Thangwi ya nsisi zanu zikulu ndifudzireni umambalanga.

²Tsukani kubulusa pyakuipa pyanga pyonsene. Ndibulusireni pyakudawa pyanga kuti ndikhale wakuchena.

³Ndadziwa umambalanga; kudawa kwanga ndimbakunyerezera mumtima ndzidzi onsene.

⁴Ndakudawirani, ndadawira imwe ene basi. Ndachita pinthu pya kukuipirani. Ndimomwene mwathemadi kunditonga mseru. Ine ndakonwa chione.

⁵Ndidakwatirwa mimba, pontho kubalwa na mama m'pyakudawa.

⁶Mtima wakuona pontho pyakuonadi ndiye pimbafuna imwe; dzazani manyerezero anga na nzeru zanu.

⁷Bulusani pyakudawa pyanga tenepo ndinakhala wakuchena; nditsukeni, ine ndinachena kupiringana matalala.

⁸Nditawiriseni kuva fala ya kukomerwa na kusekera; podi kwene kuti mwandiswa na kundipeya, ndinati ndikomerwe pontho.

⁹Fungani maso anu kuna pyakudawa pyanga, pontho fudzani pyakuipa pyanga pyonsene.

¹⁰Ikhani mtima wangwiro muna ine, Mulungu, pontho ikhani mzimu wachinchino, wakukhazikika muna ine.

¹¹Lekani kundibulusa pamaso panu; lekani kundibulusira Mzimu wanu Wakuchena.

¹²Ndipaseni pontho kukomerwa, kule kumbabulukira ku chipulumuso chanu; ndipaseni mtima wakufuna kukuverani.

¹³Tenepo ndinafunzisa anthu akudawa matongero anu, tenepo iwo anazungunukira kuna imwe.

¹⁴Ndipulumuseni kuna mseru wa kupha, Mulungu, Nyankhombo wanga,[38] tenepo ndinalalika mwakukomerwa pya kulungama kwanu.

¹⁵Ndiphedzeni kulonga, Mbuya, tenepo ndinakukuzani.

¹⁶Imwe nkhabe funa nsembe tayu, podi ndingazipereka kwene nkhabe; imwe nkhabe komerwa na nsembe zakupyerera tayu.

¹⁷Mulungu, nsembe yanga ndi mzimu wakupichepesa; imwe nkhabe dzakhonda mtima wakupichepesa na wakuleka pyakudawa tayu.

¹⁸Mulungu komerani mtima mzinda wa Zioni na kuuphedza, mangani pontho mpanda wa Yerusalemu.

¹⁹Tenepo munakomerwa na nsembe yakuthema, pontho nsembe zathu zakupyerera; ng'ombe zimuna zinati ziperekwe paguwa yanu yansembe.