Read cisena MASALIMO 52 Bible Online

MASALIMO 52 - cisena bible

MASALIMO 52

¹Kuna nyakutchemula nyimbo. Ndakatulo ya Davite, pidenda Doegi wa Chiedomu kuna Sauli kampanga kuti Davite akhadenda kunyumba ya Ahimeleki. Umbadungudziranji na kuipa kwakoku, iwe munthu wamphamvu? Kukhulupirika kwa Mulungu nkhokhonda mala.

²Imwe mumbanyerezera pinthu pyakuvunga anango, lulume yanu yakhala ninga mpeni walezi; kwanu nkhusasanya pyakunama basi.

³Pyakuipa mumbapifuna pyakwanga kupiringana kuchita pyadidi, pontho pyakunama kupiringana pyakuonadi.

⁴Iwe nyakunama! Pimbafuna iwe nkhukuwaza kwene anzako na mafalako.

⁵Natenepo Mulungu anakuvunga mwakumalisikiratu; anakugonkha kukubulusa m'nyumba mwako. Anakubulusa kudziko ya anthu amoyo.

⁶Anyakulungama anapiona penepi mbachita mantha, tenepo anakuseka mbalonga mbati,

⁷“Yang'anani, ngushu munthu akhakhonda Mulungu kuti akhale pakubisala pache ule. Iye akhanyindira kwene mfumache basi mbakula na mphamvu pakuvunga anzache ene.”

⁸Mbwenye ine ndakhala ninga muti waolivi wakumera m'Nyumba ya Mulungu. Ine ndimbanyindira kundifuna kwache kokhonda mala kwenda na kwenda.

⁹Ndzidzi onsene ndinapereka takhuta kuna imwe, thangwi ya pinthu pyachita imwe. Pamaso pa anthu anu ndinalalika kuti ndimwe wadidi.