Read cisena MASALIMO 55 Bible Online

MASALIMO 55 - cisena bible

MASALIMO 55

¹Kuna nyakutchemula nyimbo. Kuimbwa na nyakatangale. Ndakatulo ya Davite. Mulungu, ivani kupempha kwanga; lekani phopha makutu kuna kupemphera kwanga!

²Ndivenimbo ine mbamunditawire; ndamaliratu pano na pyakundisanyisa.

³Ndagoswerwa pyakwanga na kundithuswa kwa anyamalwa, ndapeyeka na kundipondedza kwa anyakundizonda. Iwo ambandidzesera nyatwa; iwo andizhangalira pontho akundizonda.

⁴Mtimanga ukusanyika pyakwanga, pontho kugoswa kwa imfa kwandigwera.

⁵Ndikutetemera na mantha, pontho ndakundwa na pyakugoswa.

⁶Ndikhapifuna pyakwanga kukhala na maphaphido ninga jiwa, tenepo mbidambulukira pyanga kutali kuti ndikagumaneko mbuto yakupuma,

⁷mbidambulukira kutali pyakwanga kakhala pyanga m'thando yatchetcha.

⁸Ine mbidachimbiza kusaka mbuto yakubisalapo, gopesera mphepo ikulu na chonzi.

⁹Mbuya, dzudzumisani pinaverana anyamalwanga! Ndaona nthonga na chimpiningu mumzinda;

¹⁰kuuzungulira mosiku na masikati; kuudzaza pontho na upandu.

¹¹Konsene kwene kwavungika; njira zadzala na kunama, pontho kuponderezana.

¹²Mbadandiseka ndi nyamalwa, mbandidapirira. Anagayayi mbadakhala nyakundizonda, ine mbidambisalira.

¹³Mbwenye ndiwe mwanzanga, wakufamba naye, munthu ninga ine, pontho shamwalianga ponda-pondembo.

¹⁴Ife tikhachedza pabodzi, pontho tikhaenda tonsene kapembedza m'Nyumba ya Mulungu.

¹⁵Anyamalwanga mbafe ndzidzi wawo udzati kwana; aende amoyo kudziko ya anyakufa! Pyakuipa pili m'nyumba zawo na mumtima mwawo.

¹⁶Mbwenye ndimbachemera MBUYA Mulungu kuti andiphedze, iye anati andipulumuse.

¹⁷Machibese, masikati na mosiku kudungunya na kubulira kwanga pimbafika kuna iye; iye anati ave falanga.

¹⁸Iye anandibweza mwadidi kubulukira kunkhondo inamenyana ine na anyamalwanga azinjiwa.

¹⁹Mulungu, ule ambatonga kwenda na kwenda, anandiva mbaakunda; thangwi iwo adakhonda kusanduza makhaliro awo, pontho iwo hambamgopa tayu.

²⁰Mwanzanga akhafamba na ine kale adasosa ashamwali ache; iye adaswa chiverano chache.

²¹Malongero ache ngakukoma ninga mkaka, kwache mumtima mwache muna nkhondo. Mafalache ngakufewa kupiringana mafuta, kwache akhala ninga talasada yakutwa.

²²Nyatwa zako zonsene uzisiye m'manja mwa MBUYA, tenepo iye anakuphata pamkono. Iye nkhabe lekerera amuna akukhulupirika kuti akundwe tayu.

²³Mbwenye imwe, Mulungu, munati muaendese anyachirope na anyakunamawa kudzenje yakuvungika mbidzati piringana kati ya moyo wawo. Mbwenye kulonga pya ine ndinati ndikunyindireni.