Read cisena MASALIMO 57 Bible Online

MASALIMO 57 - cisena bible

MASALIMO 57

¹Kuna nyakutchemula nyimbo. Malingana na nyimbo yakuti: “Lekani vunga.” Salimo ya Davite, pidathawa iye pamaso pa Sauli kuthawira m'dzimba. Ndiverenimbo nsisi ine, Mulungu, ndiverenimbo nsisi, thangwi ndimbadza kuna imwe, pakubisala panga. Imwe mumbandibisa m'maphaphido anu kufikirana kumala kwa chonzi chakugoswa.

²Ndimbachemera Mulungu Wakudzulu-dzulu, Mulungu ule ambandipasa pyakusowa pyanga pyonsene.

³Iye anatawira kubulukira kudzulu mbandipulumusa; iye anakunda anyakundisanyisa. Mulungu anaonesa kundifuna kwache kokhonda mala na kukhulupirika kwache.

⁴Ndazungulirwa na anyamalwa, ale akhala ninga nkhalamu zakudya anthu. Mano awo akhala ninga madipa na matswimo; malulume awo akhala ninga matalasada akutwa.

⁵Onesani ukulu wanu kuthambo, Mulungu, pontho demelero yanu padziko yonsene yapansi.

⁶Anyamalwa atandika malitchera awo kuti andikhweshe; mtimanga wakundwa na kuva kupha. Iwo adakumba mulindi m'njira mwanga, kwache enechiro ache ene ndiye adagweramo.

⁷Mtimanga wakhazikika, Mulungu, mtimanga wakhazikika; ndinati ndikuimbireni, pontho kukukuzani!

⁸Galamuka moyo wanga! Lamukani, nyakatangale wanga na malimbanga! Ndinati ndilamuse dzuwa.

⁹Ndinati ndipereke takhuta kuna imwe, Mbuya, pakati pa madzinza. Ndinati ndikukuzeni pakati pa anthu onsene.

¹⁰Kundifuna kwanu kokhonda mala kwafika mpakana kudzulu; kukhulupirika kwanu kwaphata thambo.

¹¹Mulungu onesani ukulu wanu kuthambo, pontho demelero yanu padziko yonsene yapansi.