Read cisena MASALIMO 58 Bible Online

MASALIMO 58 - cisena bible

MASALIMO 58

¹Kuna nyakutchemula nyimbo. Malingana na nyimbo yakuti: “Lekani vunga.” Salimo ya Davite. Ayi imwe atongi[41] mumbatonga mwachilungamo? Ayi mumbatonga anthu mseru mwakukhonda yang'ana nkhope?

²Nkhabe! Imwe mumbasasanya kuchita pyakuipa, pontho pyaupandu m'dziko.

³Anyakuipa ambaenda mbadawa moyo wawo onsene; kwawo nkhunama kwene kutomera nsiku idabalwa iwo.

⁴Iwo ana nyongo yakupha ninga ya nyoka; iwo ambafunga makutu awo ninga chipiri chokhonda kuva,

⁵chile nee chimbava kuchemera kwa nyamatsenga, podi kwene achemere mwaluso tani.

⁶Iswani mano a m'kanwa mwawo, Mulungu, khutchani mano a nkhalamu zakugoswazi.

⁷Iwo mbamale pyawo ninga madzi akukuka; apondedzwe pyawo ninga maudzu a m'njira.

⁸Mbakhale pyawo ninga nkhono yakunyunguluka kusanduka mamina; mbakhale pyawo ninga mwana wakufera m'mimba okhonda kuona kunja.

⁹Iwo mbadzati kupidziwa tayu, ambagwandwa ninga maudzu; Mulungu na kuzhangali kwache kukulu anaatswaira kuambulusa uku ana moyo.

¹⁰Anyakulungama anakomerwa pyakwanga angaona anyakudawa akutchunyuswa kuabwezera; iwo angatsuka manyalo awo m'chiropa cha anyakudawa.

¹¹Anthu analonga mbati, “Ndimomwene anyakulungama apaswadi mfupo wawo; kunja kunodi kuna Mulungu, ule ambatonga mseru dziko yapansi.”