Read cisena MASALIMO 59 Bible Online

MASALIMO 59 - cisena bible

MASALIMO 59

¹Kuna nyakutchemula nyimbo. Malingana na nyimbo yakuti: “Lekani vunga.” Salimo ya Davite, pidatuma Sauli anthu kuti akazonde kunyumba ya Davite towera amphe. Mulungu wanga, ndipulumuseni m'manja mwa anyamalwanga; nditchinjirizeni kuna anyakufuna kundiphatawa!

²Ndipulumuseni m'manja mwa anthu akuipawa; ndipulumuseni gopesera anyachiropewa!

³Yang'anani! Iwo akundidikhirira kuti andiphe; anthu akukala mtima agumanyikana kufuna moyo wanga. Nee na thangwi yakuti ndachita umambala, penu pyakudawika tayu,

⁴penu ndapichimwana, MBUYA, iwo akuchimbiza kumbuto zawo kandibisalira. Lamukani dzandiphedza, mbamupione!

⁵MBUYA Mulungu Wamphamvu zonsene, imwe ndimwe Mulungu wa Israele! Lamukani muatchunyuse madzinza okhonda kukupembedzani; lekani kuvera nsisi anyakupandukira akuipawa!

⁶Iwo ambabwera pontho na mosiku, kukhumbza ninga anambwa uku akuzunga-zunga mumzinda.

⁷Vani kutikana na kundigoswa kwawo. Malulume awo akhala ninga matalasada m'kanwa mwawo, kwache iwo ambanyerezera kuti nkhabe munthu akuava.

⁸Mbwenye imwe, MBUYA, mumbaaseka; mumbaasedegula madzinza ambakhonda kukupembedzani ale.

⁹Ine ndimbanyindira imwe, Mulungu, mphamvu zanga; thangwi imwe ndimwe mpandanga wamphamvu.

¹⁰Mulungu wanga na kundifuna kwache kokhonda mala anati adze kuna ine; iye anati andionese kukundwa kwa anyamalwanga.

¹¹Lekani kuapha, Mulungu, gopesera anthu anga anaduwalira. Abalaliseni na mphamvu zanu, pontho muakunde, Mbuya, chakugedera nacho matswimo changa.

¹²Kudawa kuli pamilomo yawo; mafalawo onsene ngakudawika; mbakwesheke na kudungudza kumbachita iwoko! Thangwi ambatemberera na kunama kwene,

¹³avungeni mwakuzhangali; avungeni kuti aleke onekave. Tenepo munthu onsene anapidziwa kuti Mulungu ambatonga m'dziko ya Israele, pontho kuti kutonga kwache kwafika kumadolomero a padziko yonsene yapansi.

¹⁴Anyamalwanga ambabwera pontho na mosiku, kukhumbza ninga anambwa ambazunga-zunga mumzinda,

¹⁵ninga anambwa ambafamba-famba kusaka kudya mbakhumbza angakhonda kukugumana kwakukwana.

¹⁶Mbwenye ine ndinati ndiimbe pya mphamvu zanu; machibese onsene ndinati ndiimbe mwakugaluza fala pya kundifuna kwanu kokhonda mala. Imwe ndimwe mpandanga wamphamvu ndzidzi onsene; ndimwe pakubisala panga pandzidzi wa nyatwa.

¹⁷Ndinati ndikukuzeni imwe, mphamvu zanga. Pakubisala panga ndi Mulungu, Mulungu ambandifuna na kundifuna kokhonda mala ule.