Read cisena MASALIMO 6 Bible Online

MASALIMO 6 - cisena bible

MASALIMO 6

¹Kuna nyakutchemula nyimbo. Kuimbwa na anyakatangale pontho bangwe. Salimo ya Davite. MBUYA, lekani kundizhangalira na kundilongera! Lekani kunditchunyusa uku mwazhangali.

²MBUYA, ine ndamaliratu pyanga pano; ndiverenimbo nsisi ine! MBUYA, ndipasenimbo mphamvu; ndatoperatu pyakwanga pene,

³pontho moyo wanga onsene wasanyika pyakwanga. MBUYA, munadikhira kufikirana lini kuti mundiphedze?

⁴Bwerani, MBUYA, mundiombole; thangwi ya kundifuna kwanu kokhonda mala ndipulumuseni.

⁵Nkhabe munthu ambakukumbukani angaenda kudziko ya anyakufa; mbani ambakukuzani kweneko.

⁶Ine ndamaliratu na kubulira; mosiku onsene ndimbatotesa patalimba panga thangwi ya kulira; nsago wanga watota na misozi.

⁷Diso yanga ikuona mwanyatwa thangwi ya kutsukwala; iwo atupa na kulira thangwi ya anyamalwanga.

⁸Bulukani pana ine, imwe anthu akuipa! MBUYA akuva kulira kwanga;

⁹MBUYA ambava kulira kwanga kufuna chiphedzo, tenepo MBUYA anatawira pinampempha ine.

¹⁰Anyamalwanga anachita manyadzo, pontho anatetemera pikulu na mantha; iwo anathawa mwakuzunguzika kabodzi kene.