Read cisena MASALIMO 63 Bible Online

MASALIMO 63 - cisena bible

MASALIMO 63

¹Salimo ya Davite, pikhali iye m'thando yatchetcha ya Yudea. Mulungu, imwe ndimwe Mulungu wanga; ine ndakutchuwani. Mtimanga onsene ukukhumba imwepo; ninga dziko yakuuma, yakuguga, pontho yakusowa madzi, moyo wanga una nyota na imwe.

²Nditawiriseni kuti ndikuoneni m'mbuto yakuchena; nditawiriseni kuti ndione mphamvu na demelero yanu.

³Kundifuna kwanu kokhonda mala nkhwakufunika kupiringana moyo, natenepo mulomo wanga unakukuzani.

⁴Ndzidzi unakhala ine na moyo ndinati ndipereke takhuta kuna imwe; ndinakwiza manjanga kuna imwe kupemphera.

⁵Moyo wanga unadya phwando mbukhuta, mbandiimba nyimbo zakukomerwa kukuza nazo imwepo.

⁶Pinagona ine patalimba, ndimbakukumbukani basi; mosiku onsene ndimbanyerezera pya imwe,

⁷thangwi ndzidzi onsene ndimwe mumbandiphedza. M'maphaphido anu ine ndimbaimba nyimbo zakukomerwa.

⁸Moyo wanga umbakakamira pana imwe, tenepo na dzanjanu mumbandiphata pamkono.

⁹Ale ambayesa-yesa pyakundipha anati atchithe pansi pa mataka pakuzwika.

¹⁰Iwo anaphiwa pankhondo, pontho manungo awo anasanduka kudya kwa matika.

¹¹Na thangwi yakuti Mulungu adamchitisa kukunda, mfumu anakomerwa. Ale ambadumbira na dzina ya Mulungu anamkuza, mbwenye mulomo wa anyakunama unaphophwa.