Read cisena MASALIMO 65 Bible Online

MASALIMO 65 - cisena bible

MASALIMO 65

¹Kuna nyakutchemula nyimbo. Salimo ya Davite; nyimbo. Mulungu, mphyadidi kuti ife tikukuzeni mu Zioni, na kuchita pidadumbira ife kuna imwe pile,

²thangwi mumbava kupemphera kwathu. Anthu onsene konsene kwene anabwera kuna imwe,

³kutongwa mseru thangwi ya pyakudawa pyawo. Kudawika kwathu kwatikunda,[45] kwache imwe mumbalekerera umambalathu.

⁴Ngakutsanzaya anthu adasankhula imwe ale, ale adadza na imwe kuti akhale pambuto yanu yakuchena. Ife tinakwana napyo pinthu pyadidi pya m'Nyumba mwanu, mtsanzayiso wa Nyumbanu yakupambulika.

⁵Mumbatitawira na mabasa akudodomesa kutipulumusa nawo, Imwe Mulungu, Nyankhombo wathu. Anthu onsene a padziko yapansi na a bara zakutali ambanyindira imwe.

⁶Mumbaikha phiri pambuto yache na mphamvu zanu kuonesadi mphamvu zanu zikulu.

⁷Imwe mumbamatamisa kutitima kwa bara na kukapira kwa mabimbi. Imwe mumbamatamisa pimpiningu pya anthu.

⁸Dziko yonsene yapansi inachita mantha thangwi ya pinthu pikulu pyachita imwe. Mabasanu adzesa mkhuwo wakukomerwa kubulukira nkhomo na nkhomo ya dziko yapansi.

⁹Mumbaonesa kutsalakana kwanu dziko pakuvumbisa mvula; mumbaichitisa kukhala na mataka akubalisa pinthu. Mumbadzaza mikulo na madzi; mumbapasa dziko yapansi umera. Imwe mumbachita tenepa:

¹⁰mumbavumbisa mvula pana minda yakutipulwa mbamuitotesa na madzi; mumbafewesa mataka na mafazi mbamuchitisa mbewu zing'ono-zing'ono kukula.

¹¹Udidi wanu umbatipasa pyakuvuna pizinji! Konsene kunaenda imwe kuna pizinji.

¹²Mpovu wamala dzala na pifuyo; m'khundu-khundu mwa mapiri munakukomerwa pyakwanga.

¹³Mbuto zakudyesera pifuyo yamala bisika na mabira; maphedi adzala na tirigu. Pyonsene pikukhuwa na kuimba mwakukomerwa.