Read cisena MASALIMO 66 Bible Online

MASALIMO 66 - cisena bible

MASALIMO 66

¹Kuna nyakutchemula nyimbo. Nyimbo; salimo. Kuzani Mulungu na mkhuwo wakukomerwa, imwe anthu monsene a padziko yapansi!

²Imbirani demelero ya dzinache; mulemedzeni na kumkuza.

³Longani kuna Mulungu kuti, “Pinthu pimbachita imwe mphyakudodomesa pyakwanga! Mphamvu zanu nsikulu pyakwanga mwakuti anyamalwanu ambalamba na mantha pamaso panu.

⁴Onsene padziko yapansi ambakupembedzani; ambaimba nyimbo zakukukuzani nazo, ambaimba nyimbo zakukuza nazo dzinanu.”

⁵Bwerani muone pyachita Mulungu; mabasache akudodomesa pakati pa anthu.

⁶Iye ambasanduza bara kukhala mtunda; makolo athu adawambuka mkulo na miyendo. Kweneko tidakomerwa pikulu thangwi ya pidachita iye.

⁷Iye ambatonga kwenda na kwenda na mphamvu zache, pontho maso ache ambaikha pana madzinza; nkhabe tawirisa kuti anyakupandukira ampandukire tayu.

⁸Mkuzeni Mulungu wathu, imwe madzinza onsene; kukuza kwanu kuveke.

⁹Iye atikoya na moyo, pontho hadatawirise kuti ife titherezike tayu.

¹⁰Mulungu, imwe mwatiyesa; mwatichenesa ninga mumbacheneserwa siliva na moto mule.

¹¹Imwe mudatileka kuti tikweshwe mumsampha, pontho mudatithukulisa mitolo yakulemera kumsana kwathu.

¹²Mudatawirisa anyamalwathu kutipondedza; ife tidagwanda na pamoto na m'madzi akukuka, mbwenye imwe mudatidzesa kumbuto yakupata.[46]

¹³Ndinati ndidze na nsembe zakupyerera ku Nyumba yanu; ndinachita kuna imwe pinthu pidadumbira ine pile.

¹⁴Ndinati ndikupaseni pinthu pidadumbira ine kuti ndinakupasani pikhali ine panyatwa.

¹⁵Ndinapereka bira kuti aotchiwe paguwa yansembe; ndinapereka nsembe ya ng'ombe zimuna na mbuzi, tenepo utsi wache unakwira kwenda kudzulu.

¹⁶Bwererani muve, monsenene anyakugopa Mulungu, tenepo ndinati ndikupangeni pyandichitira iye.

¹⁷Ndidamulirira kuti andiphedze; ndidamkuza na nyimbo.

¹⁸Mbandidabisa pyakudawa mumtima mwangamu, Mbuya nee mbadandivabi.

¹⁹Mbwenye Mulungu andivadi; iye ava kupempha kwanga.

²⁰Mbakuzwe Mulungu, thangwi iye hadakhonde kupemphera kwanga tayu, penu kubweza kundifuna kwache kokhonda mala kule.