Read cisena MASALIMO 68 Bible Online

MASALIMO 68 - cisena bible

MASALIMO 68

¹Kuna nyakutchemula nyimbo. Salimo ya Davite; nyimbo. Mulungu ambalamuka mbabalalisa anyamalwache. Anyakumzonda adathawa thangwi ya kukundwa.

²Iye ambaathamangisa ninga mumbachitira utsi kumbuluka na mphepo; ninga mumbanyungulukira upula pamoto, anthu akuipambo ambavungika chibodzi-bodzi pamaso pa Mulungu.

³Mbwenye anyakulungama akusekera na kukomerwa pamaso pache; iwo akusekera na kukhuwa thangwi ya kukomerwa.

⁴Muimbire Mulungu, muimbireni nyimbo zakukuza dzinache; msasanyireni njira, nyakukwira pamakole.[47] Dzinache ndi MBUYA, komerwani pamaso pache!

⁵Mulungu, ambakhala m'Nyumbache yakuchena ule, ambayang'anira ana akusowa babawo na mawo, pontho ambatchinjiriza amamfelwa.

⁶Iye ambapereka banja kuna anyakuisowa; iye ambatsogolera anyaperezo kumbuto yaufulu, mbwenye anyakupandukira anakhala kumbuto yakusowa madzi.

⁷Mulungu, ndzidzi udatsogolera imwe anthu anu, pikhafamba imwe pamulikiti kugwanda na m'thando yatchetcha,

⁸dziko yapansi idatekenyeka, pontho thambo idakhuthulira pansi mvula, thangwi ya kudza kwa Mulungu wa phiri ya Sinai,[48] kudza kwa Mulungu wa Israele.

⁹Imwe mudachitisa kuti mvula izinji ivumbe; dziko yanu yakuguga mudachitisa kukhala pontho yakubalisa pinthu;

¹⁰anthu anu adasasanya mbuto zawo zakukhala kweneko; na udidi wanu imwe mudapereka kuna atcherengi pyakusowa pyawo.

¹¹Mbuya adapereka utongi, tenepo akazi azinji adathukula mphangwazo mbati,

¹²“Mafumu na anyankhondo awo akuthawa!” Akazi kumusa adagawana pidapokosera iwo pankhondo:

¹³maphaphido a jiwa akukukutizwa na siliva na manthengache akukukutizwa na golidi chadi-chadi, ndzidzi ukhagona imwe m'mathanga.

¹⁴Pidabalalisa Nyamphamvu zonsene mafumu paphiri ya Zalimoni, iye adavumbisapo matalala.

¹⁵Bashani ndi phiri yamphamvu pyakwanga, phiri yakukhala na pimapiri pizinji pyakusongoka padzulu pachepo.

¹⁶Watani iwe, phiri yakukhala na pimapiri pizinji pyakusongoka, unayang'ana mwakuipirwa phiri[49] idasankhula Mulungu kuti iye akhalepo ile? MBUYA anati akhalepo kwenda na kwenda.

¹⁷Na pingolo pyache pyankhondo pikwi-pikwi Mbuya ambadza kumbuto yache yakuchena kubulukira kuphiri ya Sinai.[50]

¹⁸Iye adakwira padzululetu, mbakwata anyaperezo azinji kwenda nawo pabodzi pamulikiti; iye ambatambira mitukwa kubulukira kuna anthu podi na kuna anyakupandukirana ene. MBUYA Mulungu anakhala kweneko.

¹⁹Mbakuzwe Mbuya, thangwi ya kutithukulira nyatwa zathu nsiku na nsiku; iye ndi Mulungu, Nyankhombo wathu.

²⁰Mulungu wathu ndi Mulungu wakupulumusa; iye ndi MBUYA wakutipulumusa kuimfa ule.

²¹Mulungu anati aswedi misolo ya anyamalwache, anyakudawa, ale ambatumbama na tsisi yawo yakulapha.

²²Mbuya akulonga kuti, “Ndinati ndibwere nawo pontho anyamalwanu kubulukira ku Bashani; ndinati ndidze nawo pontho kubulukira kubara yakuzwika,

²³towera dzinyalo yako aivike m'chiropa chawo, pontho kuti anambwako anyangutembo munafunira iwo.”

²⁴Mulungu, anthu onsene aona kufamba kwanu kuonesa kukunda, iwo aona mulikiti wa Mulungu, mfumu wanga, kupita m'mbuto yache yakuchena.

²⁵Anyakuimba na mulomo ali patsogolo, anyakuimba na pyakuimbira ali m'nduli; pakati pachepo pana atsikana akuimba pisekese.

²⁶“Mkuzeni Mulungu pamgumano wa anthu ache; mkuzeni MBUYA imwe pidzukulu pyonsene pya Yakobo!”

²⁷Atome kudza ndi Benjemani, dzinza ing'onoletu; kubuluka penepo akadamu a Yuda na gulu yawo; kubuluka enewo abwere mbakadamu a Zebuloni na Nafitali.

²⁸Onesani mphamvu zanu, Mulungu; mphamvu zaphatisa imwe basa m'mbuto mwathu

²⁹kubulukira m'Nyumbanu mu Yerusalemu, kule kumbadza mafumu na mitukwawo kukupasani.

³⁰Mulongereni Iguputo, nyama yam'tsanga yakukhala m'miteteyi; alongereni madzinza, mkumbi wa mvuu zimuna na anawo ene ale, kufikirana iwo onsene alambe na kupereka silivawo. Abalaliseni madzinza ambafuna kuchita nkhondo ndzidzi onsene ale.

³¹Aimiriri a dziko anabwera kubulukira ku Iguputo; Anthu a ku Kushi[51] anakwiza manjawo kupemphera kuna Mulungu.

³²Muimbireni nyimbo Mulungu, imwe maufumu a dziko yapansi; imbani nyimbo zakukuza nazo Mbuya,

³³kuna ule ambakwira kuthambo, thambo yakale na kale, ule ambalonga na kudima kukulu.

³⁴Lalikani mphamvu za Mulungu; ukulu wache uli pana Israele, mphamvu zache zili kuthambo.

³⁵Imwe Mulungu ndimwe wakugopeka m'mbuto yanu yakuchena. Mulungu wa Israele ambapasa anthu ache mphamvu mbaawangisa mtima. Mbakuzwe Mulungu.