Read cisena MASALIMO 69 Bible Online

MASALIMO 69 - cisena bible

MASALIMO 69

¹Kuna nyakutchemula nyimbo. Malingana na nyimbo yakuti: “Maluwa a m'madzi.” Salimo ya Davite. Ndipulumuseni, Mulungu, thangwi madzi afika m'khosi mwanga;

²ndikulilima m'matope akuzwika wakusowa panango pakuponda. Ndabira m'madzi akuzwika, pontho madzi makulu andibiza.

³Ndatopa na kulira kwanga kuti mundiphedze, pontho kukhosi kwanga kwaumiratu kakata. M'maso mwanga muli bii kudikhira imwe Mulungu wanga.

⁴Anyakundizonda okhonda thangwi ngazinji ene kupiringana tsisi ya mumsolo mwanga. Anyamalwa akundilongera pyakunama; iwo ngamphamvu, pontho anafuna kundipha. Iwo adandichitisa kubwezera pinthu pyakuti nee ndidaba tayu.

⁵Pyakudawa pyanga, Mulungu, nee mphyakubisika pamaso panu nkhabe; imwe mukudziwa kupupwa kwanga konsene.

⁶Lekani tawirisa kuti ndichitise manyadzo anyakunyindirani, Mbuya, MBUYA Mulungu Wamphamvu zonsene! Lekani kunditawirisa kuti ndichitise manyadzo anyakupembedzani, Mulungu wa Israele!

⁷Ine ndatikanwa thangwi ya kutumikira imwepo mwakuti pano ndina manyadzo pyakwanga.

⁸Ndakhala ninga mlendo kuna abale anga, ninga mlendo kuna banjanga.

⁹Phinganga pana Nyumbanu ikugaka ninga moto muna ine; kutikanwa kumbatikanwa imwe kumbagwera ine pano.

¹⁰Ndimbapichepesa ndekha ene[52] pakupimana kudya, pontho anthu ambanditikana;

¹¹ndimbavala masakha kulira, kwache iwo ambandiseka.

¹²Iwo ambandilonga angafamba na njirazi, pontho anyakuledzera ambapeka nyimbo zakulonga pya ine.

¹³Kulonga pya ine, ndinapemphera kuna imwe, MBUYA; nditawireni, Mulungu, pandzidzi unasankhula imwe. Nditawireni thangwi ya kundifuna kwanu kokhonda mala, thangwi imwe mudadumbira kundipulumusa.

¹⁴Ndipulumuseni gopesera ndinalilima m'matope; ndipulumuseni kuna anyamalwanga, ndipulumuseni kuna madzi akuzwika.

¹⁵Lekani tawirisa madzi makulu kudza pana ine; lekani tawirisa kuti ndibire kwakuzwika, penu kulilima m'masiye.

¹⁶Nditawireni MBUYA, thangwi ya udidi wanu na kundifuna kwanu kokhonda mala; na kuva kwanu nyambaloku, zungunukirani kuna ine!

¹⁷Lekani kupibisa mwekha ene kuna nyabasanu; ndili panyatwa zikulu, chimbizani kunditawira!

¹⁸Bwerani kuna ine mbamundiombole; ndipulumuseni m'manja mwa anyamalwanga.

¹⁹Imwe mukupidziwa kutikanwa kunachitwa ine, kuchitiswa manyadzo na kululupiswa kunachitwa ine; imwe mukuona anyamalwanga onsene.

²⁰Kutikanwaku kukundipha mtima, pontho ndataya mtima. Ndikhadikhira kuti unango anandiverambo nsisi, mbwenye nkhabe na mbodzi ene wakundithondoza tayu.

²¹Pikhali ine na njala, iwo adandipasa kudya kwakupha; pikhali ine na nyota, iwo adandipasa vinyu wakushasha.

²²Maphwando awo avungike nawo; maphwando awo akupambulikawo mbagwe nawo.

²³Achitiseni kukhala maboli-boli! Achitiseni misanawo kukotama kwenda na kwenda!

²⁴Akhuthulireni kuzhangali kwanu, pontho moto wa ukali wanu uagwere.

²⁵Misasa inakhala iwo mbaisanduke madembe; paleke sala munthu na mbodzi ene wamoyo m'makumbi mwawo tayu.

²⁶Iwo ambaboneresa anthu adatchunyusa imwe ale; iwo ambalonga pya nyatwa za anthu adakuwaza imwe ale.

²⁷Ikhani konta pyakudawa pyawo m'mabukhu mwanu; lekani tawirisa kuti iwo akwatepo khundu muchipulumuso chanu.

²⁸Mbafudziwe madzinawo m'bukhu ya moyo; aleke lembwave pabodzi na anthu akulungama.

²⁹Mbwenye ine ndikuva kupha, pontho ndikusanyika; nditchinjirizeni, Mulungu, pontho ndipulumuseni!

³⁰Ndinati ndikuze Mulungu na nyimbo; ndinati ndilalike ukulu wache pakupereka takhuta kuna iye.

³¹Penepo pinamkomera MBUYA pyakwanga kupiringana kupereka ng'ombe kuna iye, kupiringana kupereka nsembe ya ng'ombe na njondo zache zene.

³²Anyakusanyiswa angaona penepi anasekera; anyakusaka-saka Mulungu anawangiswa mtima.

³³MBUYA ambaava anyakusowa pinthu, pontho iye nkhabe duwalira anthu ache m'perezo tayu.

³⁴Kuzani Mulungu, imwe kudzulu na dziko yapansi, bara na pyonsene pyakulengwa pili mwenemo.

³⁵Iye anapulumusa Yerusalemu na kumanga pontho maluwani a Yuda. Anthu ache anakhala kweneko mbatambira dziko kukhala yawo;

³⁶pidzukulu pya anyabasache ndiye pinatambira dzikoyo, pontho ale ambamfuna anakhala kweneko.