Read cisena MASALIMO 7 Bible Online

MASALIMO 7 - cisena bible

MASALIMO 7

¹Nyimbo ya maliro, idaimba Davite kuimbira MBUYA thangwi ya Kushi wa dzinza ya Benjemani. MBUYA, Mulungu wanga, ndikudza kuna imwe kuti ndibisale; ndipulumuseni, pontho ndiomboleni m'manja mwa anyakundithamangisa,

²gopesera anandikhwathula ninga nkhalamu na kundikhwadzula mapindi-mapindi okhonda munthu unango wakundipulumusa tayu.

³MBUYA, Mulungu wanga, ngakhala ndachita ipi, ngakhala ndadawira munthu unango,

⁴ngakhala ndapereka munthu unango m'manja mwa anyamalwache, penu kuchita pyakuzunguzika kuna anyamalwanga okhonda thangwi,[4]

⁵penepo tawirisani anyamalwanga kuti andithamangise mbandiphata. Atawiriseni kundigwanda khosi na kundipha, pontho na kundisiya pansi wakufa pontho wakululupiswa.

⁶MBUYA, lamukani na kuzhangali kwanu! Imirani kumenyana na ukali wa anyamalwanga; lamukani mwekha ene kundiphedza! Chinafuna imwe ntchilungamo,

⁷natenepo gumanyisani anthu onsene kukuzungulirani mbamuatonge kubulukira kudzulu.

⁸Imwe ndimwe nyakutonga mseru wa madzinza onsene. MBUYA, tongani mseru wanga mwakundikomera; thangwi ndachita pyakulungama, pontho ndapichita na mtima wakuona.

⁹Imwe ndimwe Mulungu wakulungama, pontho wakutonga manyerezero na pikhumbo pyathu. Anthu akudawa alekeseni kuchita pyakuipa, pontho anyakuchita pinthu pyadidi afupeni.

¹⁰Mulungu ndiye nyakunditchinjiriza; anyakukhala na mtima wakuona iye ambaapulumusa.

¹¹Mulungu ndi nyakutonga mseru mwakulungama, pontho ndzidzi onsene ambazhangalira anyakudawa.

¹²Ngakhala iwo hanaleka njira zawozo tayu, Mulungu ananozwa talasadache. Iye ambakunga utache kuti ukhale wakusasanyika;

¹³iye ambakwata pida pyache pyankhondo mbachitisa kusasanyika matswimo ache akugaka moto.

¹⁴Yang'anani munanyerezera anthu akuipa; iwo ambanyerezera pya kudzesa nyatwa mbachita pinthu pyakunama.

¹⁵Kwache misampha imbateyera iwo anthu anango, imbakwesha iwo ene enechiro.

¹⁶Natenepo iwo akutchunyuswa na pinthu pyawo pyakuipa, pontho na kuzunguza kwawoko iwo akupikuwaza.

¹⁷Ndinapereka takhuta kuna MBUYA, thangwi ya chilungamo chache, ndinaimba nyimbo zakukuza nazo MBUYA Wakudzulu-dzulu.