Read cisena MASALIMO 71 Bible Online

MASALIMO 71 - cisena bible

MASALIMO 71

¹Muna imwe MBUYA ndimbabisalamo; lekani tawirisa na pang'ono pene kuti ndichitiswe manyadzo!

²Na thangwi yakuti imwe ndimwe wakulungama ndiphedzeni, pontho mundipulumuse; ndivenimbo ine na kundipulumusa!

³Khalani phanzwi yanga kuti ndithawirepo, pontho mpanda[53] wakunditchinjiriza; imwe ndimwe pakubisala panga, pontho mpandanga wamphamvu.

⁴Mulungu wanga, ndipulumuseni m'manja mwa anyakudawika, m'manja mwa anthu akukala mtima, pontho akuipa.

⁵MBUYA Mulungu, ine ndimbaikha chidikhiro changa pana imwe; ine ndakunyindirani kutomera uwananga.

⁶Moyo wanga onsene ndanyindira imwe; mwanditchinjiriza kutomera nsiku idabalwa ine. Ndzidzi onsene ndinakuza Mulungu.

⁷Moyo wanga ndi upangizi kuna anthu azinji, thangwi imwe ndimwe mpandanga.

⁸Nsiku yonsene yamumphu ndimbakuza imwe, pontho ndimbalalika pya demelero yanu.

⁹Lekani kundikhonda lero kuti ndakalamba; lekani kundisiya ndekha thangwi mphamvu zanga zamala.

¹⁰Anyamalwanga anafuna kundipha; iwo ambalonga na kuverana pyakuipa kuchitira ine.

¹¹Iwo ambalonga kuti, “Mulungu amsiya yekha; tendeni timthamangise kuti timphate; nkhabe munthu na mbodzi ene wakumpulumusa tayu.”

¹²Lekani khala kutali na ine, Mulungu; Mulungu wanga, chimbizani kuti mundiphedze!

¹³Anyakundisosa mbakundwe, pontho avungwe. Anyakufuna pyakundikuwaza mbachite manyadzo, pontho alulupiswe.

¹⁴Ndzidzi onsene ine ndinaikha chidikhiro changa pana imwe; ndinathimiza kukukuzani pikulu pene.

¹⁵Mulomo wanga unati ulonge pya kulungama kwanu, pontho chipulumuso chanu nsiku yamumphu, podi kwene kuti ntchikulu kupiringana kuvesa kwanga.

¹⁶Ndinakuza mphamvu zanu imwe MBUYA Mulungu; ndinati ndilalike udidi wanu ene basi.

¹⁷Imwe, Mulungu, mwandifunzisa kutomera uwananga, pontho ndikuthimiza basi kulonga pya mabasanu akudodomesa.

¹⁸Lero podi ndakalamba, pontho mumsolo mwanga muna imvi, lekani kundisiya ndekha, Mulungu! Khalani na ine pabodzi pinalalika ine pya mphamvu zanu zikuluzi kuna mifendu yonsene inadzayo.

¹⁹Kulungama kwanu, Mulungu, kwafika kudzulu. Imwe mwaphata basa ikulu; nkhabeve unango ninga imwe.

²⁰Imwe mwatumiza kubonera na nyatwa zikulu pana ine, mbwenye imwe munabwezera moyo wanga kubulukira pansi pa mataka akuzwika; imwe munandilamusa kundibwezako.

²¹Munandichitisa kukhala wamkulu kupiringana kale; munandithondoza pontho.

²²Ndinati ndikukuzeni na nyakatangale; ndinakuza kukhulupirika kwanu, Mulungu wanga. Na nyakatangaleyo ndinakuimbirani nyimbo, imwe Nyakuchena wa Israele.

²³Ndinakhuwa thangwi ya kukomerwa pinakuimbirani ine; na moyo wanga onsene ndinati ndiimbe thangwi mwandiombola.

²⁴Nsiku yamumphu ndinalonga pya kulungama kwanu, thangwi anyakufuna kundikuwaza akundwa, pontho achitiswa manyadzo.