Read cisena MASALIMO 72 Bible Online

MASALIMO 72 - cisena bible

MASALIMO 72

¹Salimo ya Solomoni. Mulungu, mfunziseni mfumu kutonga mseru mwakulungama; gawanani naye chilungamo chanu,

²towera atonge anthu anu mwachilungamo, pontho na kutonga anyakusanyiswa mwakulungama.

³Pinthu pya dziko mbapifambe mwadidi; mbipione chilungamo pakati pawo.

⁴Mfumu mbaatonge atcherengi mwakuakomera; mbaphedze anyakusowa pinthu, pontho mbakunde anyakuapondereza.

⁵Anthu anu ambakupembedzani ndzidzi onsene ninga mumbakhalira dzuwa na mwezi kumwinikira kuna mifendu na mifendu.

⁶Mfumu mbakhale ninga mvula kuminda, ninga mafazi akugwera padziko.

⁷Ndzidzi unakhala iye na moyowu chilungamo mbichikhale konsene kwene, pontho kuafambira mwadidi kwa pinthu kukhala ninga mumbachitira mwezi kupereka cheza ndzidzi onsene.

⁸Ufumu wache unafika kutomera bara mpakana kubara, kubulukira kumkulo wa Yufurate mpakana kumadolomero a dziko.

⁹Madzinza a m'thando yatchetcha analamba pamaso pache; anyamalwache anabwira fumbi.

¹⁰Mafumu a ku Tarisisi na a pantchuwa anapereka mitukwa kuna iye; mafumu a ku Sheba na Seba[54] anabwera na pyakupereka pyawo kuna iye.

¹¹Mafumu onsene analamba pamaso pache; madzinza onsene anamtumikira.

¹²Iye ambapulumusa anyakutcherenga anamchemerawo, pontho na anyakusanyiswa akusowa anyakuaphedza.

¹³Iye ambava nsisi na anyakusowa mphamvu na atcherengi; iye ambapulumusa moyo wa anyakusowa kuti aleke kufa.

¹⁴Iye ambaapulumusa kuna kuponderezwa na upandu; chiropa chawo ntchakufunika pyakwanga kuna iye.

¹⁵Dondowe Mfumu! Iye mbapaswe golidi wa kudziko ya Sheba; mbapemphererwe ndzidzi onsene; mtsanzayiso wa Mulungu mbukhale pana iye ndzidzi onsene.

¹⁶M'dziko monsene mbamukhale mapira; mapiri onsene mbadzale na mbewu, zakubala pyakwanga, ninga za ku Lebanoni. Mizinda mbidzale na anthu ninga minda yakudzala na maudzu.

¹⁷Dzina ya mfumu mbileke duwalikave; kuveka kwache mbakukhale kwenda na kwenda ninga mumbakhalira dzuwa. Madzinza onsene mbamkuze, mbapemphe Mulungu kuti aatsanzayise ninga mwatsanzayisira iye mfumu.[55]

¹⁸Mkuzeni MBUYA Mulungu wa Israele! Iye ene basi ambachita pinthu pyakudodomesapi.

¹⁹Kuzani dzinache yademeleroyo kwenda na kwenda! Demelero yache mbidzale dziko yonsene yapansi. Ameni! Ameni!

²⁰Kweneku nkhumala kwa kupemphera kwa Davite, mwana wa Yese.