Read cisena MASALIMO 73 Bible Online

MASALIMO 73 - cisena bible

MASALIMO 73

¹Salimo ya Asafu. Ndimomwene Mulungu ngwadidi kuna anthu a ku Israele, kuna ale ana mtima wakuchena.

²Mbwenye kulonga pya ine manyalo anga akhali chifupi kutherezika; ndikhali chifupi kulimbuka,

³thangwi ine ndikhachita bivu na anthu akudungudza, pidaona ine kuti anthu akudawika pinthu pyawo pikuafambira mwadidi.

⁴Iwo nkhabe ona nyatwa; iwo ngamphamvu pontho ngakuwanga.

⁵Iwo nkhabe ona nyatwa ninga mumbachitira anthu anango; iwo nkhabe sanyika ninga mumbasanyikira anango tayu.

⁶Natenepo kudungudza kwawo kwakhala ninga mkufu, pontho kuzunguza kwawo ninga mkhanjo;

⁷mumtima mwawo mumbabuluka pyakuipa, pontho manyerezero awo ambakhala kaliki-liki kusasanya pyakudawika.

⁸Iwo ambaseka anthu anango mbaalongera pinthu pyakuipa; iwo ngakudungudza, pontho ambasasanya njira zakupondereza nazo anango.

⁹Iwo ambalonga pyakuipa kuna Mulungu wa kudzulu, pontho ngakutapira m'kanwa konsene kunaenda iwo padziko yonsene yapansi,

¹⁰towera anthu ene a Mulungu azungunukire kuna iwo, mbakhuta na mafala onsene analonga iwo.

¹¹Iwo ambalonga kuti, “Mulungu nkhabe dzapidziwa tayu; Nyakudzulu-dzuluyo nkhabe udziwisi tayu.”

¹²Mwenemo ndiye mumbakhalira anyakudawika. Ndzidzi onsene yawo ndi tsenzo pontho kupifumisa okha ene.

¹³Kadi ntchinthu chakusowa basa kuti ine ndapikoya ndekha ene wangwiro, okhonda chita chinthu chakudawika?

¹⁴Mulungu mwandichitisa kusanyika nsiku yamumphuyi; machibese onsene mwanditchunyusa.

¹⁵Mbandidalonga pinthu ninga penepi, mbandidakhala nyakunama kuna anthu anu.

¹⁶Ndidayesa-yesa kuti ndivese penepi, mbwenye kuna ine chikhali chinthu chakunensa pyakwanga

¹⁷kufikirana ndidenda kumbuto yanu yakuchena. Penepo ndidavesesa pile pinafuna dzachitikira anyakudawika.

¹⁸Imwe munaaikha pambuto yamitherezi pyakwanga mbamuachitisa kugwera kumbuto yakuvungika!

¹⁹Iwo anavungwa kabodzi kene; iwo anamaliratu na pyakugoswa.

²⁰Iwo akhala ninga ndoto, zile zimbabalalika kunja kungaecha; imwe mungalamuka mwekha ene, Mbuya, iwo hambaonekavebi.

²¹Pikhandipha mtimanga na kusanyika m'moyo mwanga,

²²ndidapupwiratu ninga nyama; ine sidakuvesesani tayu.

²³Kwache ndzidzi onsene ndimbakhala chifupi na imwe, tenepo imwe mumbandiphata pamkono.

²⁴Imwe mumbanditsogolera na uphungu wanu, tenepo pakumalisira pache munanditambira na chilemedzo.

²⁵China ine m'dzulumo ninji pontho? Nkhabe, mbwenye imwe ene. Podi ine ndina imwe, chinafuna ine ninji pontho padziko yapansi?

²⁶Manyerezero anga na manungo anga anakwanisa kusowa mphamvu, mbwenye Mulungu ndiye mphamvu zanga; iye ndi pyonsene pyakusowa pyanga.

²⁷Anyakukhala kutali na imwe, anati avungike; imwe munavunga anyakukhonda khulupirika kuna imwe ale.

²⁸Mbwenye kulonga pya ine mphyadididi kwene kukhala chifupi na Mulungu, kuti ndibisale muna MBUYA Mulungu, pontho kulalika pyonsene pyachita iye.