Read cisena MASALIMO 74 Bible Online

MASALIMO 74 - cisena bible

MASALIMO 74

¹Salimo ya Asafu. Mwatikhonderanji tenepa, Mulungu? Ayi imwe munazhangalira anthu anu kwenda na kwenda?

²Kumbukani anthu adasankhula imwe kale ene kukhala anu ene; ale adaombola imwe pa ubitchu kuti akhale dzinza yanu ene. Kumbukani phiri ya Zioni kudakhala imwe pakutoma kule.

³Famba-fambani pamadembewa; anyamalwathu amala sakaza pyonsene m'mbuto yanu yakuchena.

⁴Anyamalwanu akhuwa pikulu kumbuto ikhagumanikirana imwe na ife; iwo amanika mabanderawo kweneko kuonesa kukunda.

⁵Iwo akhaoneka ninga anyakusaka nkhuni akutema miti na mbadzo zawo.

⁶Iwo adapandula-pandula pyakusema-sema pyonsene na mbadzo zawo pontho nyundo.

⁷Iwo adavunga mbuto yanu yakuchena mbaipisa; iwo adaswipisa mbuto ikhapembedzwa imwe ile.

⁸Iwo akhafuna ativunge tonsene kuti tonsene timaliretu; mbuto yonsene yakupembedzera Mulungu monsene adaipisa.

⁹Pidzindikiro pyanu pyakudodomesa pyonsene pyaenda; nkhabe mprofeti na mbodzi ene asala tayu, pontho nkhabe munthu na mbodzi ene akudziwa kuti penepi pinamala lini tayu.

¹⁰Mulungu, anyamalwathu analeka lini kutiseka? Ayi anatikana dzinanu kwenda na kwenda?

¹¹Mwatani mwakhonda kutiphedza? Mwatani munabalira manja kunduli?

¹²Mbwenye imwe, Mulungu, ndimwe mfumu wathu kubulukira pakutomaletu; kazinji kene imwe mwatipulumusa.

¹³Na mphamvu zanu zonsene mudagawa bara mbamuswa misolo ya anyangume;

¹⁴mudapondedza msolo wa nyangume Leviatani mbamupereka manungo ache kuna nyama[56] za m'thando yatchetcha kuti aadye.

¹⁵Imwe mudasasanya mphuno za madzi na mikulo ene; mudapwesa mikulo yokhonda kupwa.

¹⁶Mudalenga mosiku na masikati; mudaikha dzuwa na mwezi mbuto zawo;

¹⁷mudaikha madolomero a dziko yapansi; mudasasanya mainja na malimwe.

¹⁸Kwache kumbukani, MBUYA, kuti anyamalwanu akukusekani; anthu akupupwa alulupisa dzinanu.

¹⁹Lekani siya anthu anu akusowa chiphedzo m'manja mwa anyamalwawo akukala mtima; lekani duwalira anthu anu ambabonera ale!

²⁰Kumbukani chiverano chidachita imwe na ife. Mbuto zonsene zamdima zadzala na upandu.

²¹Lekani tawirisa kuti anyakuponderezwa achitiswe manyadzo; lekani anyakutcherenga na anyakusowa kuti akukuzeni.

²²Lamukani mwekha ene Mulungu kuti mutchinjirize mseru wanu! Kumbukani kuti mapupwe ambakusekani nsiku yamumphu.

²³Lekani duwalira kukhuwa kwakuzhangali kwa anyamalwanu, kusokosa kukulu kwa anyakukuzondani.