Read cisena MASALIMO 76 Bible Online

MASALIMO 76 - cisena bible

MASALIMO 76

¹Kuna nyakutchemula nyimbo. Kuimbwa na anyakatangale. Salimo ya Asafu; nyimbo. Mulungu ngwakudziwika m'nthemba ya Yudea; dzinache njakulemedzwa m'dziko ya Israele.

²Iye ana Nyumba mumzinda wa Yerusalemu; iye ambakhala pa Phiri ya Zioni.

³Penepo iye adatchola matswimo a anyamalwa, pyakugedera matswimo pyawo na matalasadawo, ande, pida pyawo pyankhondo pyonsene.

⁴Mulungu, imwe ndimwe wakudemelera! Imwe ndimwe wakugopeka, ndzidzi umbabwerera imwe kubulukira kumapiri, kudakunda imwe anyakukuzondani kule.

⁵Anyankhondo awo akuwanga mtima atapatwa na pyonsene pikhali na iwo, tenepo chinchino akugonera mkono; mphamvu zawo na luso yawo, pyonsene pikhali pyakusowa basa.

⁶Mulungu wa Yakobo, pidaathuswa imwe, akavalo na anyakuafambisawo ene adafa.

⁷Mbwenye imwe mumbagopwa na anthu onsene. Imwe mungazhangali nkhabe na mbodzi ene anakwanisa kuimira pamaso panu tayu.

⁸Imwe mudachitisa kuti kutonga kwanu mseru kudziwike kubulukira kudzulu, tenepo dziko yapansi idachita mantha mbimatama,

⁹ndzidzi udalamuka imwe kutonga anthu mseru, kupulumusa anyakusanyika onsene padziko yapansi.

¹⁰Kuzhangalira kwanu anthu kumbakudzeserani chilemedzo; anyakupulumuka kuna ukali wanu anakupembedzani.

¹¹Perekani kuna MBUYA Mulungu wanu pidadumbira imwe kuna iye pile; idzani kuna iye na mitukwa, imwe madzinza onsene achifupi. Mulungu ambachitisa kuti anthu amgope;

¹²iye ambachepesa ana mafumu achimuna akudungudza, pontho ambathuswa mafumu akulu-akulu.