Read cisena MASALIMO 77 Bible Online

MASALIMO 77 - cisena bible

MASALIMO 77

¹Kuna nyakutchemula nyimbo. Kuna Yedutuni. Salimo ya Asafu. Ndimbalira mwakukalala kuna Mulungu; ndimbakalala na kulira, tenepo iye ambandiva.

²Pandzidzi wa nyatwa ndimbapemphera kuna Mbuya; mosiku onsene ndimbakwiza manjanga m'dzulu kupemphera, kwache nkhabe kwanisa kugumana chithondozo tayu.

³Ndinganyerezera pya Mulungu, ndimbabulira mumtima; ndinganyerezera pyakwanga, ndimbataya mtima.

⁴Iye ambandikhalisa m'maso mosiku onsene; ndaswipa mtima pyakwanga mwakuti ine nkhabe kwanisa longa.

⁵Ndimbanyerezera pya nsiku zagwandazo, pontho ndimbakumbuka pyaka pyakale.

⁶Mosiku wamumphu ndimbanyerezera pikulu;[59] ndimbanyerezera pyakwanga mbandipivunza ndekha ene kuti:

⁷“Ayi Mbuya ndzidzi onsene anandikhonda? Ayi iye hanakomerwave nafe pontho tayu?

⁸Ayi iye aleka kutifuna kokhonda mala? Ayi pinthu pidadumbira iye nkhabe dzapichitave tayu?

⁹Ayi Mulungu aduwalira kukhala wansisi? Ayi kuzhangali kwapita m'mbuto mwa kuva kwache nyambalo?”

¹⁰Tenepo ndidalonga kuti, “Chinthu chimbandipha maka ntchakuti, mkono wa Nyakudzulu-dzulu nkhabeve mphamvu tayu.”

¹¹Ndinakumbuka mabasanu akulu, MBUYA; ndinakumbuka pyakudodomesa pidachita imwe m'ndulimu.

¹²Ndinanyerezera pinthu pyonsene pyachita imwe; ndinanyerezera pyakwanga pya mabasanu onsene amphamvu.

¹³Pyonsene pimbachita imwe, Mulungu, mphyakuchena. Nkhabe mulungu wamkulu ninga Mulungu wathu tayu.

¹⁴Imwe ndimwe Mulungu wakuchita pyakudodomesa; imwe mudaonesa mphamvu zanu pakati pa madzinza.

¹⁵Na mphamvu zanu mudaombola anthu anu, pidzukulu pya Yakobo, pontho pya Yosefe pile.

¹⁶Ndzidzi udakuonani madzi, Mulungu, ndzidzi udakuonani madzi, madziwo adachita mantha; kuzwika kwa bara kudatetemera na mantha.

¹⁷Makole adavumbisa mvula; chiphaliwali chidalira kuthambo, pontho njazi idachetuma khundu zonsene.

¹⁸Kulira kwa chiphaliwali kudaveka m'chivumbulu, pontho kuchetuma kwa njazi kudaonesa cheza padziko yapansi; dziko yapansi idatetemera mbitekenyeka.

¹⁹Imwe mudagwanda na pamabimbi; mudawambuka nyanza yakuzwika, kwache mphondero yanu hudakwanise kuoneka tayu.

²⁰Imwe mudatsogolera anthu anu ninga mumbachitira makabuswa kudzera muna Mose na Aroni.