Read cisena MASALIMO 78 Bible Online

MASALIMO 78 - cisena bible

MASALIMO 78

¹Ndakatulo ya Asafu. Veserani, anthu anga, chifunziso changa, pontho ikhani makutu kuna pinalonga inepi.

²Ine ndinati ndilonge m'misangani mbandilonga pinthu pyakubisika pidachitika m'ndulimu,

³pinthu pyava ife na kupidziwa, pinthu pidatipanga makolo athu.

⁴Ife nkhabe dzabisira anathu tayu; tinapanga mfendu unadzawo pya mphamvu za MBUYA na mabasache akulu, pontho na pinthu pyakudodomesa pyachita iye.

⁵Iye adapereka matongero kuna anthu a Israele, pontho matongero kuna pidzukulu pya Yakobo. Iye adapanga makolo athu kufunzisa anawo matongero ache,

⁶towera mfendu ikhafuna kudzayo idziwe matongerowo, pontho kuti iwo apangembo anawo.

⁷Na njira yeneyi iwo ananyindirambo Mulungu mbakhonda duwalira pinthu pyachita iye, mbwenye ndzidzi onsene kuvera matongero ache.

⁸Iwo nkhabe dzakhala ninga makolo awo tayu, anthu akupandukira, pontho okhonda vera, ale chinyindiro chawo pana Mulungu chikhali chakukhonda khazikika, pontho ale adachimwana kukhala akukhulupirika kuna iye.

⁹Anthu a dzinza ya Eferemu adamenya nkhondo na mauta, pontho matswimo, tenepo adathawa pansiku idamenywa nkhondo.

¹⁰Iwo hadakoye chiverano chawo na Mulungu tayu; iwo adakhonda kuvera mwambo wache.

¹¹Iwo adaduwalira pikhadachita iye, pyakudodomesa pikhadamuona iwo akuchita.

¹²Ndzidzi ukhachita Mulungu pyakudodomesa m'nthemba ya Zoani m'dziko ya Iguputo, makolo awo akhayang'ana.

¹³Iye adagawa nyanza mbaawambusa napo; iye adachitisa madzi kuimira ninga mafufu.

¹⁴Na masikati iye adaatsogolera na makole, pontho mosiku wamumphu iye adaatsogolera na cheza cha moto.

¹⁵Iye adadidimula miyala m'thando yatchetcha mbaapasa madzi kubulukira pansi pakuzwika.

¹⁶Iye adachitisa mikhwawa kubulukira m'mwala mbachitisa madzi kukuka ninga mikulo.

¹⁷Mbwenye iwo adathimiza kudawira Mulungu, pontho m'thando yatchetcha iwo adapandukira Nyakudzulu-dzulu.

¹⁸Iwo adayesa Mulungu chadala pakupempha pyakudya pikhafuna iwo.

¹⁹Iwo adalonga mwakupokanyisana na Mulungu mbati, “Kadi Mulungu anakwanisa kupereka kudya m'thando yatchetcha?

²⁰Mphyakuona kuti iye adamenya pamwala, madzi mbabuluka m'mwalamo na kukuka. Kadi iye anakwanisa pontho kutipasa mikate mbaapasa pontho anthu ache nyama?”

²¹Natenepo pidapiva MBUYA, adazhangali napyo; iye adapisa anthu na moto, pontho ukali wache pana iwo udakula,

²²thangwi iwo hadakhulupire Mulungu tayu, pontho iwo hadakhulupire tayu kuti iye anaapulumusa.

²³Mbwenye iye adalonga kuna thambo ya m'dzulu mbatonga kuti misuwo yache ifunguke;

²⁴iye adaapasa mana kuti adye; phoso yakubulukira kudzulu ile.

²⁵Tenepo iwo adadya kudya kwa angelo, pontho Mulungu adaapasa pyonsene pikhafuna iwo.

²⁶Iye adachitisa pontho mphepo yambalu kudza, pontho na mphamvu zache iye adavundula mphepo yamwera,

²⁷pontho kuna anthu ache iye adagwisa nyama ninga fumbi, mbalame zakuinjipa ninga tchetcha pagombe;

²⁸izo zidagwa pakati pa msasa kuzungulira makumbi.

²⁹Tenepo anthu adadya mbakhuta; Mulungu adaapasa pikhafuna iwo,

³⁰kwache usawo mbudzati mala, podi kwene kuti nyama zikhali m'kanwa mwawo,

³¹Mulungu adaazhangalira mbapha anthu awo amphamvu, aphale akufunika a Israele.

³²Iwo adathimiza kudawa pyawo, nee kuona penepi tayu; iwo hadanyindire tayu na kuona pyakudodomesa penepi.

³³Natenepo iye adamalisa nsiku zawo ninga kuimira kwa kupuma, pontho miyoyo yawo na pyakugoswa.

³⁴Ndzidzi onsene ukhapha iye anango a iwo, anango akusalawo akhazungunukira kuna iye; iwo akhatchunyuka mbapemphera na mtima onsene.

³⁵Iwo adakumbuka kuti Mulungu akhali Phanzwi yawo, kuti Mulungu Wakudzulu-dzulu akhali Dombo wawo.

³⁶Mbwenye pyonsene pikhalonga iwo pikhali pyakutapira; nee chibodzi chidalonga iwo chikhali chakuona tayu.

³⁷Mitimawo hikhali yakuona tayu kuna iye; iwo hakhali akukhulupirika tayu kuna chiverano chawo na iye.

³⁸Mbwenye Mulungu akhava nsisi na anthu ache. Iye adalekerera pyakudawa pyawo; kazinji kene iye akhauphata mtimache mbakhonda kunyanyula ukali wache onsene.

³⁹Iye adakumbuka kuti iwo akhali anthu ambafa ale, ninga mphepo, ile imbadza mbimala.

⁴⁰Kazinji kene iwo adampandukira m'thando yatchetcha; kazinji kene iwo adamtsukwalisa m'thando mule!

⁴¹Ndzidzi uzinji iwo adamuyesa Mulungu mbavesa kupha Mulungu Wakuchena wa Israele.

⁴²Iwo adaduwalira mphamvu zache zikulu, pontho nsiku idaaombola iye m'manja mwa anyamalwawo

⁴³mbachita mabasache amphamvu na pyakudodomesa paphedi ya Zoani m'dziko ya Iguputo.

⁴⁴Iye adasanduza mikulo kukhala chiropa, tenepo anthu a ku Iguputo adasowa madzi akumwa.

⁴⁵Iye adatumiza ntchentche zizinji pakati pawo, zile zidaaonesa nyatwa, pontho anyanchidwe, ale adaipisa dziko yawo.

⁴⁶Iye adagwisa mabobo kuti adye mbewu zawo; nyadzombe kuvunga mindawo.

⁴⁷Iye adapha mindawo yamfesa na matalala, pontho miti yawo yamkuyu na kutonthola.

⁴⁸Iye adapha ng'ombe zawo na matalala, pontho mikumbi yawo ya mabira na njazi.[60]

⁴⁹Iye adachitisa kuona nyatwa zikulu pakuakhuthulira kuzhangali na ukali wache wakugoswa, pile pidadza ninga angelo ankhondo akudzesa imfa.

⁵⁰Iye hadabweze ukali wache tayu, penu kukhonda vunga miyoyo yawo, mbwenye adaapha na muliri.

⁵¹Iye adapha ana achimuna autombo a m'mabanja onsene a anthu a mu Iguputo; ana autombo a ale akhakhala makumbi a Hamu.

⁵²Iye adatsogolera anthu ache ninga makabuswa mbaayang'anira m'thando yatchetcha monsene.

⁵³Iye adaatsogolera mwadidi, tenepo iwo hadachite mantha tayu; mbwenye nyanza idadza mbibizika anyamalwawo.

⁵⁴Iye adaadzesa kudziko yache yakuchena; dziko ya mapiri idakunda iye ene na mphamvu zache.

⁵⁵Iye adathamangisa enechiro ache pikhaenda anthu ache; mbagawa dziko yawo pakati pa madzinza a Israele, mbapereka midzi yawoyo kuna anthu ache.

⁵⁶Mbwenye iwo adapandukira Mulungu Wakudzulu-dzulu mbamuyesa. Iwo hadavere matongero ache tayu;

⁵⁷ninga makolo awo, iwo akhali akupandukira, pontho okhonda khulupirika; okhonda nyindirika ninga uta wa pitchenkho.

⁵⁸Iwo adamzhangalisa na mbuto zawo zakupembedzerapo milungu, pontho adamzhangalisa pyakwanga na kupembedza kwawo mifanikizo.

⁵⁹Mulungu adazhangali pidaona iye penepi, tenepo iye adapasiratu anthu ache nkhodolo.

⁶⁰Iye adakhonda Chikhumbi chache pambuto ya Shilo,[61] Chikhumbi chidakhazikisa iye pakati pa anthu chile.

⁶¹Iye adatawirisa anyamalwathu kupokosera Bokosi ya Chiverano, chinthu chakuonesa mphamvu na demelero yache.

⁶²Iye adazhangalira anthu ache ene mbatawirisa kuti aphiwe na anyamalwawo.

⁶³Aphale adaphiwa na moto, tenepo atsikana adasowa anyakuasemba.

⁶⁴Anyansembe adafa na matalasada, tenepo amamfelwawo hadatawiriswe kusintili tayu.

⁶⁵Pakumalisira pache Mbuya adalamuka khala ninga akhali m'chitulo; iye akhali ninga munthu wamphamvu wakudzipirwa na vinyu.

⁶⁶Iye adathamangisa anyamalwache kuabweza, na kuachitisa manyadzo okhonda mala.

⁶⁷Mbwenye iye adakhonda pidzukulu pya Yosefe; iye hadasankhule dzinza ya Eferemu tayu.

⁶⁸M'mbuto mwache iye adasankhula dzinza ya Yuda na Phiri ya Zioni, phiri ya pamtima pache.

⁶⁹Penepo adasasanyapo mbuto yache yakuchena ninga musache wa kudzulu; iye adaichitisa kukhala yakukhazikika ninga dziko yapansi kwenda na kwenda.

⁷⁰Iye adasankhula Davite nyabasache; iye adamkwata mumpovu,

⁷¹kukhadyesa iye mkumbi wa pifuyo pyache mbamuikha kukhala mfumu wa Israele, makabuswa wa anthu a Mulungu.

⁷²Davite adaayang'anira na mtima onsene mbaatsogolera mwanzeru.