Read cisena MASALIMO 79 Bible Online

MASALIMO 79 - cisena bible

MASALIMO 79

¹Salimo ya Asafu. Mulungu, madzinza achita nkhondo na dziko yanu yakuchena; iwo aswipisa Nyumbanu yakuchena mbasiya madembe mzinda wa Yerusalemu.

²Iwo asiya mitembo ya anthu anu kuti idyiwe na mbalame, mitembo ya anyabasanu kuti idyiwe na nyama zam'tsanga.

³Iwo adachuchisa ninga madzi chiropa cha anthu anu; chiropa kukukambo ninga madzi mu Yerusalemu monsene, pontho nee mbodzi adasala kuti afikhire anyakufawo tayu.

⁴Madzinza akuzungulira ale adatikana; iwo adatiseka mbatiselusa.

⁵MBUYA, kani munafuna pyakutizhangalira kwenda na kwenda? Kani ukali wanu ukuthimiza ninga moto?

⁶Zhangalirani madzinza, ale ambakhonda kukupembedzani, anthu ale ambakhonda kupemphera kuna imwe.

⁷Thangwi iwo apha anthu anu; iwo achitisa dziko yanu kukhala madembe.

⁸Lekani kutitchunyusa thangwi ya kudawa kudachita makolo athu. Tiverenimbo nsisi ife chinchino; ife tataya chidikhiro chathu chonsene.

⁹Tiphedzenimbo, Mulungu, Nyankhombo wathu, tipulumuseni pontho mutilekerere pyakudawa pyathu, thangwi ya kudzesa demelero kuna dzinanu.

¹⁰Pyakhala tani kuti madzinza ale ativunze kuti: “Mulungu wanu ali kupi?” Mbatikuoneni mukutchunyusa madzinza thangwi ya kuchuchisa chiropa cha anyabasanu.

¹¹Veserani kubulira kunachita anyaperezoku, tenepo asudzuleni pa nyatwa zawo na mphamvu zanu zikulu anyakutongwa kuphiwa ale.

¹²Mbuya, pagalini madzinza anango kanomwe kuabwezera, thangwi ya kukutikanani konsene kwachita iwoku.

¹³Tenepo ife, anthu anu mabira a pamkumbi panu, tinapereka takhuta kuna imwe kwenda na kwenda mbatikukuzani mifendu yonsene inadzayo.