Read cisena MASALIMO 80 Bible Online

MASALIMO 80 - cisena bible

MASALIMO 80

¹Kuna nyakutchemula nyimbo. Malingana na nyimbo yakuti: “Maluwa a m'madzi a Chiverano.” Salimo ya Asafu; umboni. Tiveserenimbo ife, Makabuswa wa Israele; tivenimbo ife, imwe ule mumbatsogolera mkumbi wanu. Ule mumbakhala pampando wanu wachifumu padzulu pa pyakulengwa pyakukhala na maphaphido,

²pidziwiseni mwekha ene kuna madzinza a Eferemu, Benjemani na Manase. Tioneseni mphamvu zanu; idzani mutipulumuse!

³Tibwezereni kuna imwe, Mulungu! Tioneseni nsisi zanu, tenepo ife tinapulumuka!

⁴Kufikirana lini, MBUYA Mulungu Wamphamvu zonsene, munazhangalira kupemphera kwa anthu anu?

⁵Imwe mwaadzesera kutsukwala kuti akudye, pontho khomitcho ikulu yakudzala na misozi kuti aimwe.

⁶Imwe mudatawirisa madzinza akuzungulira kuti achite nkhondo thangwi ya dziko yathu; anyamalwathu ambatitikana.

⁷Tibwezereni kuna imwe, Mulungu Wamphamvu zonsene! Tioneseni nsisi zanu, tenepo ife tinapulumuka!

⁸Imwe mudadza na mtawi wamfesa kubulukira kudziko ya Iguputo; imwe mudabulusa madzinza anango mbamubzala mtawi wamfesa m'dziko mwawamo.

⁹Imwe mudausasanyira mbuto kuti iwo umere; mitsitsi yache idapita pansi mwakuzwika, pontho udavata m'dziko yonsene.

¹⁰Udapasa mthunzi mapiri onsene; nthambi zache zidaphimbira miti yakujintcha ya mikungudza.

¹¹Nthambi zache zidatanthawira ku Bara ya Mediterania, pontho mpakana kumkulo wa Yufurate.

¹²Mwatani mudagwisa mipanda yakuzungulira mtawi wamfesawo? Chinchino munthu wakugwanda pyache na penepo anakwanisa kuba mfesazo:

¹³nkhumba zam'tsanga zimbazipondedza, pontho nyama zam'tsanga zimbazidya.

¹⁴Zungunukirani kuna ife, Mulungu Wamphamvu zonsene! Tiyang'aneni pansi pano kubulukira kudzuluko; idzani mutipulumuse!

¹⁵Idzani mupulumuse mtawi wamfesa udabzala imwe ule, mtawi wamfesa ung'ono udachitisa imwe kuti ukule na mphamvu ule.

¹⁶Anyamalwathu aupisa moto pontho autema-tema; azhangalireni, pontho muavunge!

¹⁷Koyani, pontho tchinjirizani anthu asankhula imwe ale, dzinza idachitisa imwe kukhala yamphamvu ile.

¹⁸Ife nkhabe dzabauka pontho kubuluka kuna imwe tayu; tikoyeni na moyo, tenepo ife tinakulemedzani.

¹⁹Tibwezereni kuna imwe, MBUYA Mulungu Wamphamvu zonsene. Tioneseni nsisi, tenepo ife tinapulumuka.