Read cisena MASALIMO 81 Bible Online

MASALIMO 81 - cisena bible

MASALIMO 81

¹Kuna nyakutchemula nyimbo. Malingana na nyimbo ya Agititi. Salimo ya Asafu. Khuwani na kukomerwa kuna Mulungu nyakutitchinjirizathu; muimbireni Mulungu wa Yakobo nyimbo zakumkuza nazo!

²Tchemulani nyimbo mbamuimbe pisekese; imbani nyimbo zakukoma na anyakatangale, pontho malimba.

³Lizani ngoma ya paphwando, ndzidzi wakubalwa kwa mwezi, pontho ndzidzi una iwo wamumphu.

⁴Wenewu ndi mwambo m'dziko ya Israele, wakuchita kutongwa na Mulungu wa Yakobo.

⁵Iye adaukhazikisa pakati pa anthu a Israele ndzidzi udasosa iye dziko ya Iguputo. Ndikuva fala yokhonda dziwika kulonga kuti,

⁶“Ine ndidakunundula nyatwa zakunduli kwanu; ine ndidachitisa kuti mutule mitolo ya njerwa ikhathukula imwe.

⁷Ndzidzi ukhali imwe panyatwa, mudandichemera, inembo ndidakupulumusani. Ine ndidakutawirani kubulukira m'chonzi mukhabisala ine mule. Ine ndidakuyesani pamphuno za madzi za Meriba.

⁸Veserani, anthu anga, kukucheuzani kunachita ine; Israele, ine ndikupifunadi kuti iwe mbudandivesera!

⁹Pakati panu paleke khala milungu yachilendo, penu kupembedza milungu yakubulukira kwinango tayu.

¹⁰Ine ndine MBUYA Mulungu wako, adakubulusa m'dziko ya Iguputo ule. Fungula mulomo wako, inembo ndinakudyesa.

¹¹“Mbwenye anthu anga hadafune kundivesera tayu; Israele hadafune pyakundivera tayu.

¹²Tenepo ndaaleka kuti akhale pyawo akuuma mtima, pontho achite pyawo pinthu pyonsene pikhafuna iwo.

¹³“Ndikhapifunadi kwene kuti anthu anga mbadandivesera; ndikhapifunadi kwene kuti iwo mbadandivera.

¹⁴Ine mbandidakunda kabodzi kene anyamalwawo mbandikunda anyakuazonda onsene.

¹⁵Anyakundizonda mbadabunyala na mantha pamaso panga; kutchunyuswa kwawo mbakudakhala kwenda na kwenda.

¹⁶Mbwenye ine mbandidakudyesani na tirigu wadidi mbandikukhutisani na uchi wakubulukira m'mwala.”