Read cisena MASALIMO 83 Bible Online

MASALIMO 83 - cisena bible

MASALIMO 83

¹Salimo ya Asafu; nyimbo. Mulungu, lekani khala mulomo phoo; lekani matama kwene, Mulungu, okhonda longa na chinthu chene!

²Yang'anani! Anyamalwanu akuchita chimpiningu, pontho anthu ambakuzondani ale akupandukira.

³Iwo akusasanya njira zachibiso-biso kusosa nazo anthu anu; iwo ambaverana kuchita pyakuipa pana anthu ambatchinjiriza imwe ale.

⁴Iwo akulonga kuti, “Tendeni tivunge madzinzawo, towera Israele aduwalike kwenda na kwenda.”

⁵Iwo atawirizana papinthu pinafuna iwo chita, pontho aphatizana kukhala abodzi kuti amenye nkhondo namwe;

⁶anthu a ku Edomu pontho na Aishimaele; anthu a ku Moabu pontho na Ahagiri,

⁷anthu a ku Gebali, Amoni, na Amaleki, pontho a ku Filisti na Turo.

⁸Na Asiria enembo aphatizana nawo kusasanya gulu ibodzi yamphamvu yankhondo kupandukira pidzukulu pya Loti.

⁹Chitani kuna iwo ninga pidachita imwe Amidiani, pontho kuna Sisera na Yabini pamkulo wa Kishoni.

¹⁰Imwe mudaakunda pa Endori, pontho mitembo yawo idavunda pyayo pamtunda.

¹¹Chitani kuna akadamu awo ninga pidachita imwe kuna Orebu na Zeebu; kundani atongi awo onsene ninga mudachita imwe kuna Zeba na Zalimuna,

¹²ule adalonga mbati, “Tinapokosera dziko yonsene yampovu ya Mulungu kukhala yathu.”

¹³Abalaliseni ninga fumbi, Mulungu, ninga goche yakumbuluka na mphepo.

¹⁴Ninga moto wakupisa msitu, ninga malulume a moto akupisa mapiri,

¹⁵athamangiseni na chonzi chanu, pontho muathuswe na mphepo yanu yakugoswa.

¹⁶Achitiseni kuti akhale na nkhope zakutota, kufikirana iwo atome kusaka-saka imwe, MBUYA.

¹⁷Mbakundwe, pontho agope kwenda na kwenda; iwo mbafe na kululupiswa kukulu.

¹⁸Iwo mbadziwe kuti imwe ene mwekha ndimwe MBUYA, Nyakudzulu-dzulu, mtongi wa dziko yonsene yapansi.