Read cisena MASALIMO 84 Bible Online

MASALIMO 84 - cisena bible

MASALIMO 84

¹Kuna nyakutchemula nyimbo. Malingana na nyimbo ya Agititi. Salimo ya nkhonda Kora. Nyumbanu ndimbaifuna pyakwanga, MBUYA Wamphamvu zonsene!

²Ndikupifunadi kuti ndikhale mwenemo! Ndatchuwa kukhala m'Nyumba ya MBUYA. Na manungo anga onsene ndimbaimba na kukomerwa kuna Mulungu wamoyo.

³Podi na ntchenga zene zamanga chisa, pontho anyanzeze ana misawo; iwo ambakoya anawo chifupi na maguwanu ansembe, MBUYA Wamphamvu zonsene, mfumu wanga, pontho Mulungu wanga.

⁴Ngakutsanzaya anthu ale ambakhala m'Nyumba mwanu, ale ndzidzi onsene ambaimba nyimbo zakukuza nazo ukulu wanu.

⁵Ngakutsanzaya anthu ale mphamvu zawo zimbabulukira kuna imwe, ale asasanyika kwenda paulendo kapembedza pa Phiri ya Zioni.

⁶Ndzidzi unagwanda iwo na paphedi yakuuma ya Baka, phediyo imbasanduka mbuto ya mphuno za madzi, pontho mvula ya phumphuli imbaidzaza na mathawale.

⁷Iwo ambathimiza kukhala na mphamvu ndzidzi unaenda iwo; iwo anati aone Mulungu wa milungu pa Phiri ya Zioni.

⁸Ivani kupemphera kwanga, MBUYA Mulungu Wamphamvu zonsene. Ndivesereni, Mulungu wa Yakobo!

⁹Mulungu tsanzayisani mfumu wakutitchinjiriza, mfumu asankhula imwe ule.

¹⁰Nsiku ibodzi kukhala m'Nyumba mwanu mphyadidi pyakwanga kusiyana na kukhala nsiku chikwi chibodzi kunango kwene; ine mbidakomerwa kukhala nyakulondali msuwo wa mpanda wa Nyumba ya Mulungu wanga, kusiyana na kukhala m'misa ya anthu akuipa.

¹¹MBUYA Mulungu ndi mfumu wakutitchinjiriza pontho wakudemelera, wakutitsanzayisa na wakukoma mtima pontho chilemedzo. Iye nkhabe khondera chinthu chadidi tayu kuna ale ambachita pinthu pyakulungama.

¹²MBUYA Wamphamvu zonsene, ngakutsanzaya anthu ambakunyindirani ale.