Read cisena MASALIMO 85 Bible Online

MASALIMO 85 - cisena bible

MASALIMO 85

¹Kuna nyakutchemula nyimbo. Salimo ya nkhonda Kora. MBUYA, imwe mwavera nsisi dziko yanu; imwe mwachitisa pinthu pya Israele kuti pifambe pontho mwadidi.

²Imwe mwalekerera pyakudawa pya anthu anu, pontho mwafudza pyakudawika pikhadachita iwo pile.

³Imwe mudaleka kuazhangalira mbamuleka kuonesa ukali wanu wakugoswa.

⁴Tibwezereni kuna imwe, Mulungu, Nyankhombo wathu, pontho lekani kukhonda komerwa nafe kukhachita imwe kule!

⁵Kadi imwe munatizhangalira kwenda na kwenda? Kadi kuzhangali kwanu kunakhala mifendu na mifendu?

⁶Tisisimuseni pontho, towera ife, anthu anu, tikukuzeni.

⁷Tioneseni kutifuna kwanu kokhonda mala, MBUYA, pontho tiphedzeni pakutipulumusa.

⁸Ine ndikuvesera pinalonga MBUYA Mulungu; iye ambadumbira kutipasa mtendere, ife anthu ache, ngakhala ife tinakhonda bwerera pontho kuna pinthu pyakupupwa pikhachita ife kale.

⁹Ndimomwene kuti iye asasanyika kupulumusa anthu ambamulemedza ale, towera demelero yache ikhale m'dziko mwathu muno.

¹⁰Kutifuna kwanu kokhonda mala na kukhulupirika kwanu pinagumanikana pabodzi; kulungama na mtendere pinakhumbatirana.

¹¹Kukhulupirika kwa munthu kunatumbuka kubulukira pansi, pontho chilungamo cha Mulungu chinayang'ana pansi pano kubulukira kudzulu.

¹²MBUYA anachitisa pinthu pyathu kufamba mwadidi, pontho dziko yathu kubulusa pyakuvuna pyadidi.

¹³Kulungama kunaenda patsogolo pache mbakumsasanyira njirache.