Read cisena MASALIMO 86 Bible Online

MASALIMO 86 - cisena bible

MASALIMO 86

¹Kupemphera kwa Davite. Ndivesereni, MBUYA, pontho nditawireni, thangwi ndine nyakutcherenga pontho nyakuponderezwa.

²Ndipulumuseni kuimfa, thangwi ndine wakukhulupirika kuna imwe; ndipulumuseni, thangwi ndine nyabasanu, pontho ndimbanyindira imwe.

³Imwe ndimwe Mulungu wanga, tenepo ndivereni nsisi, Mbuya; ndimbapemphera kuna imwe nsiku yonsene.

⁴Chitisani nyabasanu kukomerwa, Mbuya, thangwi ndimbakupembedzani na mtimanga onsene.

⁵Imwe, Mbuya, ndimwe wadidi kuna ife, pontho nyakulekerera pyakudawa, wakudzala na kuafuna kokhonda mala anthu onsene ambapemphera kuna imwe ale.

⁶Ivani, MBUYA, kupemphera kwanga; ivani chiliro changa, kulira kuti mundiphedze.

⁷Ndimbakuchemerani pandzidzi wa nyatwa, thangwi imwe mumbava kupemphera kwanga.

⁸Pakati pa milungu nkhabepo unango ninga imwe, Mbuya, nee na mbodzi ene achitambo ninga pyachita imwepi tayu.

⁹Madzinza onsene adalenga imwe anati adze kukulambirani imwe, Mbuya; iwo anakuza ukulu wanu.

¹⁰Imwe ndimwe wamphamvu, pontho mumbachita pinthu pyakudodomesa; imwe ene basi ndimwe Mulungu.

¹¹Ndifunziseni, MBUYA, pinafuna imwe kuti ndipichite, tenepo ine ndinakuverani mwakukhulupirika; ndifunziseni kukuphatirani basa mwakupipereka monsene mwene.

¹²Ndinakukuzani na mtimanga onsene, Mbuya Mulungu wanga; ndinakuza dzinanu kwenda na kwenda.

¹³Kundifuna kwanu kokhonda mala nkhukulu pyakwanga! Imwe mwandipulumusa kudziko ya anyakufa.

¹⁴Amuna akudungudza akundipandukira, Mulungu; gulu ya amuna akukala mtima akusaka-saka moyo wanga, anthu okhonda tsalakana pya imwe ale.

¹⁵Mbwenye imwe, Mbuya, ndimwe wansisi, pontho wakuva nyambalo, ndzidzi onsene ndimwe wakupirira, ndzidzi onsene ndimwe wakutifuna kokhonda mala, wakukoma mtima, pontho wakukhulupirika.

¹⁶Zungunukirani kuna ine mbamundivere nsisi; mpaseni nyabasanu mphamvu, pontho mundipulumuse, thangwi ndimbakuphatirani basa, sasawa ninga mukhachitira mamanga.

¹⁷Ndioneseni pidzindikiro pya udidi wanu, MBUYA, towera anyamalwanga apione mbachita manyadzo, thangwi imwe mwandithondoza pontho mwandiphedza.