Read cisena MASALIMO 88 Bible Online

MASALIMO 88 - cisena bible

MASALIMO 88

¹Salimo ya nkhonda Kora; kuna nyakutchemula nyimbo. Ndakatulo ya Hemani wa Chiezara. MBUYA Mulungu, nyankhombo wanga, ndimbalira nsiku yonsene, pontho na mosiku ndimbadza pamaso panu.

²Ivani kupemphera kwanga; veserani kulira kwanga kuti mundiphedze!

³Tenepo nyatwa zikulu zandigwera mwakuti moyo wanga ukufedza chifupi na dziko ya anyakufa.

⁴Ine ndakhalambo ninga anthu anango onsene ali chifupi kufa ale, mphamvu zanga zonsene zamala kwenda.[63]

⁵Ndine munthu wakusiyiwa pakati pa anyakufa ndakhala ninga munthu wakuchekwa wakugona m'masiye mwawo, anthu aduwaliraletu imwe ale, ale nkhabe kwanisa kuphedzwa na imwe tayu.

⁶Imwe mwandiponya m'chiphompho chakuzwika, m'dzenje yamdima pyakwanga, pontho yakuzwika pyakwanga.

⁷Kuzhangali kwanu pana ine kukuchita kulemerambo, pontho ndapeyiwa pansi pa mabimbi ache.

⁸Imwe mwabulusa pana ine ashamwali anga a chifupiletu; imwe mwandisandusa chakunyansa kuna iwo. Ine ndafungirwa, tenepo nkhabe kwanisa kuthawa tayu;

⁹maso anga ngakuthima thangwi ya kusanyika. MBUYA, nsiku zonsene ndimbalira kuna imwe mbandikwiza manjanga m'dzulu kupemphera.

¹⁰Kadi imwe mumbachita pyakudodomesa kuna anyakufa? Kadi iwo ambalamuka mbakukuzani?

¹¹Kadi kutifuna kwanu kokhonda mala kumbalongwa m'masiye, penu kukhulupirika kwanu kulongwa kumbuto ya kuvungika?

¹²Kadi pyakudodomesa pyanu pimbaonekera kumbuto yamdima, penu udidi wanu kuoneka m'dziko ya anyakuduwalika?

¹³MBUYA, ndikukuchemerani kuti mundiphedze; machibese onsene ndimbapemphera kuna imwe.

¹⁴Mwatani munandikhonda, MBUYA? Mwatani munandipasa nkhodolo?

¹⁵Kutomera uphaleanga ndaona nyatwa mbandisala chifupi kufa; ndatopa nawo mtolo wa kunditchunyusa kwanu.

¹⁶Kuzhangali kwanu kwakugoswa kwandipeya, pontho kundisosa kwanu kwakugoswa kwandivunga.

¹⁷Nsiku yamumphu iwo ambandizungulira ninga madzi makulu; iwo andifungira khundu zonsene.

¹⁸Imwe mwabulusa pana ine anzanga, anthu ambafuna ine ale, pontho mdima ukhale shamwalianga wa chifupiletu.