Read cisena MASALIMO 89 Bible Online

MASALIMO 89 - cisena bible

MASALIMO 89

¹Ndakatulo ya Etani wa Chiezara. MBUYA, ndzidzi onsene ndinaimba pya kutifuna kwanu kokhonda mala; na mulomo wanga ndinalonga pya kukhulupirika kwanu mifendu na mifendu.

²Ndikupidziwa kuti kundifuna kwanu kokhonda mala kunakhalapo kwenda na kwenda, pontho kuti kukhulupirika kwanu nkhwakukhazikika ninga thambo.

³Imwe mudalonga mbati, “Ine ndachita chiverano na munthu adasankhula ine ule; ine ndadumbira kuna nyabasanga Davite kuti,

⁴‘Chidzukulu chako ndzidzi onsene chinakhala mfumu; ndinakhazikisa ufumu wako kwenda na kwenda.’ ”

⁵Kudzulu kumbaimba pya pinthu pyakudodomesa pimbachita imwe; anyakuchena ambaimba pya kukhulupirika kwanu, MBUYA.

⁶Nkhabe unango na mbodzi ene wa kudzulu sasawa na imwe, MBUYA; nkhabe unango mwa anyakukhala kudzulu akulandani tayu.

⁷Imwe mumbagopiwa pamgumano wa anyakuchena; onsene pamaso panu ambaimira mwamantha.

⁸MBUYA Mulungu Wamphamvu zonsene, nkhabe unango wamphamvu ninga imwe; ndimwe wakukhulupirika papinthu pyonsene, MBUYA.

⁹Imwe mumbatonga panyanza yamphamvu, imwe mumbangothesa mabimbi ache aukali.

¹⁰Imwe mudapeya nyangume, Rahabi,[64] ninga mbodzi wa anthu akuchekwa; na mphamvu zanu zikulu mudakunda anyamalwanu.

¹¹Kudzulu nkhwanu, pontho na pansi pano pene; imwe mudalenga dziko yapansi na pyonsene pili mwenemo.

¹²Imwe mudalenga kumpoto na kumwera; Phiri ya Tabori, pontho Phiri ya Herimoni pimbakuimbirani thangwi ya kukomerwa.

¹³Manjanu ngamphamvu pyakwanga! Mphamvu zanu nsikulu pyakwanga!

¹⁴Kulungama na chilungamo ndi maziko a ufumu wanu; kutifuna kwanu kokhonda mala na kukhulupirika kwanu pimbaenda patsogolo panu.

¹⁵Ngakutsanzaya anthu ambakupembedzani na nyimbo, ale ambakhala m'cheza cha kukoma kwanu mtima, MBUYA.

¹⁶Na thangwi ya imwe, iwo ambakomerwa nsiku yamumphu, pontho iwo ambakukuzani thangwi ya udidi wanu.

¹⁷Imwe mumbatipasa kukunda kukulu; na kutifuna kwanu mumbatichitisa kuti tikunde.

¹⁸Imwe, MBUYA, mudatisankhulira nyakutchinjiriza; imwe, Mulungu Wakuchena wa Israele, mudatipasa mfumu wathu.

¹⁹Kale ene kumasomphenya imwe mudalonga kuna anyabasanu akukhulupirika kuti, “Ine ndaphedza nyankhondo wakuveka; ine ndapasa ufumu kuna mbodzi adasankhula ine pakati pa anthu ule.

²⁰Ine ndagumana Davite, nyabasanga; ine ndamdzoza na mafuta akuchena.

²¹Ndzidzi onsene mphamvu zanga zinakhala na iye, ndimomwene mkono wanga unamchitisa kukhala wamphamvu.

²²Anyamalwache nkhabe dzamuikha pansi pa utongi wawo tayu; anyakudawika nkhabe dzamkunda tayu.

²³Ine ndinapeya anyamalwache pamaso pache mbandipha onsene anyakumzonda.

²⁴Kumfuna kwanga kokhonda mala na kukhulupirika kwanga kunakhala na iye; ndzidzi onsene ndinamchitisa kukhala nyakukunda.

²⁵Ndinathimiza ufumu wache kubulukira ku Bara ya Mediterania mpakana kumkulo wa Yufurate.

²⁶Iye analonga kuna ine kuti, ‘Imwe ndimwe babanga, pontho Mulungu wanga; imwe ndimwe Phanzwi pontho Nyankhombo wanga.’

²⁷Ine ndinamchitisa kukhala mwananga wautombo, wamkulu kupiringana mafumu onsene a padziko yapansi.

²⁸Ndzidzi onsene ndinachita pidadumbira ine kuna iye, pontho kumfuna kwanga kokhonda mala kunamkoya kwenda na kwenda.

²⁹Ufumu wache unakhazikika ninga thambo; mbodzi wa pidzukulu anatonga kwenda na kwenda.

³⁰“Mbwenye ngakhala pidzukulu pyache pinakhonda kuvera mwambo wanga mbapikhonda teweza matongero anga,

³¹ngakhala pinakhonda ikha konta pinaapanga ine kuchita mbakhonda koya matongero anga,

³²penepo ine ndinaatchunyusa thangwi ya pyakudawa pyawo; ndinaachitisa kuti aone nyatwa thangwi ya kudawika kwawo.

³³Mbwenye ine nkhabe dzasiya kumfuna kokhonda mala Davite tayu, penu kuchimwana dzachita pidadumbira ine kuna iye pile.

³⁴Ine nkhabe dzaswa chiverano chasasanya ine naye tayu, penu kubweza na chinthu chibodzi chidadumbira ine chene tayu.

³⁵“Kabodzi pontho ndzidzi onsene ndadumbira na dzinanga yakuchena; ine nkhabe dzanama kuna Davite tayu.

³⁶Iye ndzidzi onsene anakhala na pidzukulu, pontho ine ndinayang'anira ufumu wache ndzidzi onsene una ife na dzuwa.

³⁷Pinakhala pyakukhazikika kwenda na kwenda ninga mwezi, ule ndi mboni yakukhulupirika kuthambo.”

³⁸Mbwenye imwe mwazhangalira mfumu wanu wakusankhulika; imwe mwamsiya yekha, pontho mwamkhonda.

³⁹Imwe mwafudza chiverano chanu na nyabasanu mbamuponya m'matope chipewu chache chachifumu.

⁴⁰Imwe mwagomola mafufu a mzindache mbamusiya mpandache madembe.

⁴¹Onsene anyakugwanda na penepo ambaba pinthu pyache; atsanthembache onsene ambamseka.

⁴²Imwe mwachitisa kuti anyamalwache amkunde; onsene mwaachitisa kuti akomerwe.

⁴³Imwe mwachitisa pida pyache kusanduka pyakusowa basa kuti akundwe pankhondo.

⁴⁴Imwe mwabulusa demelero yache[65] mbamufikhira mpando wache wachifumu pansi.

⁴⁵Imwe mwamkalambisa mbali mphale mbamumchitisa manyadzo pakwecha.

⁴⁶MBUYA, kadi munapibisa mwekha kwenda na kwenda? Kuzhangali kwanu kwakugaka ninga moto kunafikirana lini?

⁴⁷Kumbukani kuvira kwachita moyo wanga. Kadi imwe mwaduwalira kuti mwatilenga tonsenefe anthu akusowa basa?

⁴⁸Mbani anakwanisa kukhala na moyo mbakhonda kufa? Mbani anakwanisa kupipulumusa yekha ene kuna mphamvu za dziko ya anyakufa?

⁴⁹Mbuya, pili kupi pitsikimizo pyakutoma pya kutifuna kwanu kokhonda mala? Kudumbira kudachita imwe kuna Davite kuli kupi?

⁵⁰Mbuya, lekani duwalira munatikanirwa ine, nyabasanu, munapirira ine kutembererwa[66] konsene kunandichita madzinza onsene.

⁵¹Anyamalwanu akutikana mfumu wanu wakusankhulika, MBUYA! Iwo ambamtikana konsene kwene kunaenda iye.

⁵²Kuzani MBUYA kwenda na kwenda! Ameni! Ameni!