Read cisena MASALIMO 9 Bible Online

MASALIMO 9 - cisena bible

MASALIMO 9

¹Kuna nyakutchemula nyimbo. Malingana na nyimbo yakuti: “Imfa ya Mwana.” Salimo ya Davite. Na mtimanga onsene, ndinakukuzani imwe, MBUYA; ndinati ndilonge pyakudodomesa pyonsene pyachita imwe.

²Ndinati ndiimbe mwakukomerwa thangwi ya imwe. Ndinati ndiimbe nyimbo zakukuza imwe, Nyakudzulu-dzulu.

³Anyamalwanga ambazungunukira m'nduli pimbaonekera imwe; iwo ambagwa pansi mbafa.

⁴Imwe mumbatonga mseru mwadidi, pontho mwakukoma mtima, tenepo mwatonga mseru wanga mwakundikomera.

⁵Imwe mwalongera madzinza onsene mbamuvunga anthu akudawika. Iwo nkhabe kumbukirikave tayu.

⁶Anyamalwathu amaliratu; imwe mwavunga mizindawo, tenepo iwo anaduwalirwa kwenda na kwenda.

⁷Mbwenye MBUYA ndi mfumu wakukhala na kukhala; iye aikha mpando wache wachifumu kuti atonge mseru.

⁸Iye ambatonga dziko yapansi mwakulungama; iye ambatonga mseru madzinza na chilungamo.

⁹MBUYA ndiye pakubisalirapo anthu akusanyika, mbuto yakupata pandzidzi wa nyatwa.

¹⁰Onsene ambakudziwani imwe MBUYA anati akunyindireni; munthu onsene wakudza kuna imwe, imwe nkhabe kumsiya yekha ene tayu.

¹¹Imbani nyimbo zakukuza nazo MBUYA, mfumu wa Zioni! Pangani madzinza onsene pyachita iye!

¹²Mulungu nyakutchunyusa anyachirope, ambakumbuka anyakubonereswa onsene; iye nkhabe duwalira kulira kwawo tayu. Pontho anyakuadawira, iye ambaatchunyusa.

¹³Ndiverenimbo nsisi ine, MBUYA! Yang'anani nyatwa inandionesa ine anyamalwangayi. Ndipulumuseni kubulukira kuna mphamvu za imfa,

¹⁴towera ndikwanise kuimira pamaso pa anthu a ku Yerusalemu mbandiapange pinthu pyonsene pinakukuzirani ine. Ndinati ndikomerwe thangwi mudandipulumusa.

¹⁵Madzinza akumba mulindi, mbagweramo ndiwo ene. Iwo akwesheka na misamphawo yonthoyo.

¹⁶MBUYA apitchulula yekha ene na kutonga kwache mwakulungama; na mabasawo onthowo anthu akuipa akwesheka.

¹⁷Anyakudawa anaenda kudziko ya anyakufa; madzinza onsene ambakhonda Mulungu ale.

¹⁸Ndzidzi onsene anthu akusowa pinthu nkhabe dzaduwalirwa tayu; chidikhiro cha anthu akutcherenga nkhabe dzapondedzwa tayu.

¹⁹Bwerani MBUYA! Lekani tawirisa munthu kukhala wakukunda. Dzani nawo madzinza pamaso panu mbamuatonge mseru.

²⁰Achitiseni kukhala amantha, MBUYA; achitiseni kudziwa kuti iwo mbanthu ene pyawo.