Read cisena MASALIMO 90 Bible Online

MASALIMO 90 - cisena bible

MASALIMO 90

¹Kupemphera kwa Mose, munthu wa Mulungu. Mbuya, mifendu na mifendu imwe ndimwe musathu.

²Imwe mbamudzati lenga mapiri, penu kuchitisa dziko yapansi kukhalapo, imwe mukhali Mulungu wakukhala na kukhala, pontho munakhala Mulungu kwenda na kwenda.

³Imwe mumbapanga munthu kubwerera pontho ninga mukhali iye kale; imwe mumbamsanduza kubwerera kufumbi.

⁴Kuna imwe pyaka chikwi chibodzi pyakhala ninga nsiku ibodzi; pyakhala ninga nsiku yagwanda kwene ile ninga ora ya mosiku.

⁵Imwe mumbatikukulula ninga madzi makulu; timbakhala kwene pang'ono basi ninga ndoto. Takhala ninga tsanga yakumera na machibese

⁶ile imbakula na kubulusa maluwa, mbwenye imbakhunyata na kuferatu dzuwa ingagaka.

⁷Ife tavungwa na kuzhangali kwanu; tagoswerwa na ukali wanu.

⁸Imwe mumbaikha pakwecha pyakudawa pyathu pamaso panu, pyakudawa pyathu pyachibiso-biso pambuto panakwanisa imwe kupiona.

⁹Moyo wathu wavira na kuzhangali kwanu; pyaka pyathu pyonsene pimbamala ninga kulonga chiwere-were.

¹⁰Pyaka makumanomwe ndiye pina ife pene basi, pyaka makumasere ngakhalambo tina mphamvu; kwache pyonsene pimbatidzesera ipyo ndi nyatwa na kutsukwala basi; moyo chinchino unamala, tenepo ife tinadyiwa na madzi.

¹¹Mbani ambadziwa mphamvu za kuzhangali kwanu? Mbani ambadziwa mantha pinakwanisa kudzesa ukali wanu?

¹²Tifunziseni kulengesa nsiku za moyo wathu, towera m'moyo wathu tikhale anthu anzeru.

¹³Munafikirana lini mukutizhangalira? MBUYA, verani nsisi anyabasanu!

¹⁴Machibese onsene tidzazeni na kutifuna kwanu kokhonda mala, towera tiimbe na kukomerwa moyo wathu onsene.

¹⁵Chinchino tichitiseni kuti tikomerwe pikulu ninga pidachitisa imwe kuti titsukwale ndzidzi wa pyaka pya kutsukwala kwathu konsene.

¹⁶Titawiriseni ife, anyabasanu, kuona mabasanu amphamvu; tawirisanimbo pidzukulu pyathu kuona demelero yanu yamphamvu.

¹⁷Mbuya Mulungu wathu, mtsanzayiso wanu mbukhale nafe. Chitisani pyonsene pinachita ife kukwanisika; ande, pichitiseni kukhala pyakukwanisika!