Read cisena MASALIMO 91 Bible Online

MASALIMO 91 - cisena bible

MASALIMO 91

¹Iye ule ambaenda kuna Nyakudzulu-dzulu kuti akatchinjirizwe, pontho ule ambakhala mumthunzi wa Nyamphamvu zonsene

²anakwanisa kulonga kuna iye kuti, “Imwe ndimwe pakubisala panga, pontho mpandanga wamphamvu. Imwe ndimwe Mulungu wanga, ambanyindira ine ule.”

³Iye anakukoya mwadidi kuna nyatwa ya msampha wakugoswa, pontho kuna muliri onsene wakupha.

⁴Iye anakubisa na maphaphido ache; iwe unakhala mwadidi m'manja mwache; kukhulupirika kwache kunakuyang'anira mwadidi, pontho kunakutchinjiriza.

⁵Imwe nkhabe dzagopa chakugoswa chonsene chakudza na mosiku, penu chakugoswa chakututumusa chakudza na masikati tayu,

⁶penu muliri, ule umbadza mumdima, penu anyakuipa ambapha na masikati ale tayu.

⁷Anthu chikwi anakwanisa kufera m'khundu mwanu, pikwi khumi kukuzungulirani, kwache imwe nkhabe kuwazika tayu.

⁸Imwe munayang'ana mbamuona, mule munafuna dzatchunyusirwa anyakudawika.

⁹Imwe mwachitisa MBUYA kukhala pakubisala panu, pontho Nyakudzulu-dzulu kukhala mbuto yanu yakupata,

¹⁰tenepo nkhabe nyatwa zinakudzerani tayu, nee chakuvunga chinabwera chifupi na musanu tayu.

¹¹Mulungu anaikha angelo ache kukuyang'anira kukutchinjiriza konsene kwene kunaenda iwe.

¹²Iwo anakuthukula m'manja mwawo, towera manyalo ako aleke kuwazika na miyala.

¹³Iwe unapondedza nkhalamu na mbadza, nkhalamu zakugoswa na nyoka zakupha.

¹⁴MBUYA akulonga kuti, “Ndinapulumusa anthu ambandifuna ale, pontho ndinatchinjiriza ale ambatawira kuti ndine MBUYA.

¹⁵Iwo angandichemera, ndinaatawira; pandzidzi wa nyatwa ndinakhala nawo, ndinaapulumusa pontho ndinaalemedza.

¹⁶Ndinaafupa na moyo wakulapha; mbandiaonesa chipulumuso changa.”