Read cisena MASALIMO 95 Bible Online

MASALIMO 95 - cisena bible

MASALIMO 95

¹Idzani, tendeni timkuze MBUYA! Tendeni timuimbire mwakukomerwa Phanzwi, pakubisala pathu!

²Tendeni tidze pamaso pache na kupereka takhuta mbatiimba nyimbo zakumkuza nazo mwakukomerwa.

³Thangwi MBUYA ndi Mulungu wamphamvu, mfumu wamphamvu kupiringana milungu yonsene.

⁴Iye ambatonga dziko yonsene yapansi, kubulukira m'madzimba akuzwikaletu mpakana mapiri akulaphaletu.

⁵Iye ambatonga pabara idalenga iye ile; dziko idasasanya iye mwenechiro na manjache.

⁶Idzani, tendeni tilambe mbatimpembedza; mbatigodameni pamaso pa MBUYA, nyakutisasanya!

⁷Iye ndi Mulungu wathu; ife ndife anthu ambatsalakana iye ale, mkumbi umbapasa iye pyakusowa pyawo. Veserani lero pinalonga iye kuti,

⁸“Lekani umisa mtima ninga mudachita makolo anu pa Meriba, pontho ninga nsiku ikhali iwo pa Masa m'thando yatchetcha mule.

⁹Kweneko iwo adandiyesa; iwo adayesa kupirira kwanga, podi kwene kuti iwo akhaona pinthu pidaachitira ine.

¹⁰Pyaka makumanayi ine ndidaipirwa na anthu a mfendu wenewu. Ndidalonga kuti, ‘Anthumwe ndimwe okhonda khulupirika! Iwo adakhonda kuvera matongero anga.’

¹¹Ndidaazhangalira mbandidumbira kuti: ‘Imwe nkhabeve dzapita m'dziko ikhafuna ine kukupumisani ile.’ ”