Read cisena MASALIMO 96 Bible Online

MASALIMO 96 - cisena bible

MASALIMO 96

¹Imbirani MBUYA nyimbo yachinchino! Imbirani MBUYA, imwe anthu a padziko yonsene yapansi!

²Imbirani MBUYA na kumkuza! Nsiku na nsiku lalikani pya chipulumuso chache.

³Vekesani demelero yache kuna anthu a madziko onsene, vekesani pya mabasache akudodomesa kuna madzinza onsene.

⁴MBUYA ngwamkulu, pontho athema kulemedzwa pikulu pene; iye athema kugopiwa kupiringana milungu yonsene.

⁵Milungu ya madzinza anango onsene ndi mifanikizo ene basi, mbwenye MBUYA adalenga kudzulu.

⁶Demelero na ufumu pyamzungulira; mphamvu na kubalika pyadzala m'mbuto yache yakuchena.

⁷Kuzani MBUYA, anthu onsene a padziko yapansi; kuzani MBUYA thangwi ya demelero na mphamvu zache.

⁸Kuzani dzina ya MBUYA yakudemelera; idzani na nsembe, pontho idzani ku Nyumbache.

⁹Lambani pamaso pa Nyakuchena ndzidzi unaoneka iye;[69] tetemera na mantha pamaso pache dziko yonsene yapansi!

¹⁰Longani kuna madzinza onsene kuti, “MBUYA ndi mfumu! Dziko yapansi yakhazikika pyakwanga pene, tenepo nkhabe kwanisika kutekenyeka tayu; iye anatonga mseru madzinza na chilungamo.”

¹¹Komerwani, dziko yapansi na thambo! Bangula, iwe bara na pyonsene pyakulengwa pili muna iwepyo;

¹²komerwani, minda, na pyonsene pili muna imwe! M'misitu miti yonsene iimbe thangwi ya kukomerwa

¹³ndzidzi unabwera MBUYA dzatonga padziko yapansi. Iye anatonga madzinza padziko yapansi mwachilungamo, pontho mwakukhonda yang'ana nkhope.