Read cisena MASALIMO 98 Bible Online

MASALIMO 98 - cisena bible

MASALIMO 98

¹Salimo. Imbirani MBUYA nyimbo yachinchino; iye achita pinthu pyakudodomesa! Mphamvu zache, pontho ungwiro wache pyamchitisa kukunda.

²MBUYA adalonga pya kukunda kwache; iye aonesa kulungama kwache pamaso pa madzinza.

³Iye adachita pidadumbira iye kuna dzinza ya Israele mwakukhulupirika, pontho na kuafuna kokhonda mala. Anthu onsene konsene kwene aona kukunda kwa Mulungu wathu.

⁴Imbirani MBUYA, dziko yapansi, thangwi ya kukomerwa; mkuzeni na nyimbo, pontho na mkhuwo wakukomerwa nawo!

⁵Imbirani MBUYA nyimbo zakumkuza nazo! Imbani nyimbo na nyakatangale!

⁶Lizani ngoma na nyanga za bira, pontho khuwani kuna MBUYA, mfumu wathu, thangwi ya kukomerwa.

⁷Iwe bara, bangula, pontho na pyonsene pili muna iwe; dziko yapansi, imba, pontho na onsene ambakhala penepo!

⁸Imbani manja, mikulomwe; imwe mapiri, imbirani pabodzi na kukomerwa,

⁹mbapiimbe pamaso pa MBUYA, thangwi iye akudza dzatonga dziko yapansi. Iye anatonga mseru anthu padziko yapansi mwachilungamo, pontho mwakukhonda yang'ana nkhope.