Read cisena MIYAMBI 1 Bible Online

MIYAMBI 1 - cisena bible

MIYAMBI 1

¹Yeneyi ndi miyambi ya Solomoni mwana Davite, mfumu wa Israele:

²kufunzisa nayo anthu nzeru pontho upangizi; kuvesa mafala audziwisi;

³kufunzisa nayo anthu kukhala na makhaliro adidi pontho na kuva mwambo, kukhala akulungama, achilungamo pontho akutonga mwakukhonda yang'ana nkhope;

⁴kuchitisa nayo munthu okhonda dziwa pinthu kukhala wakungwala, pontho kufunzisa kuvesa pinthu na kupitonga kwa pinthu mwadidi kuna achiphale.

⁵Anyanzeru mbavesere miyambi kuti athimizire udziwisi wawo, pontho anyakudziwa pinthu mbakhala na luso,

⁶towera avese miyambi na misangani, pontho pifunziso na nthanthi pya anyanzeru.

⁷Kugopa MBUYA ndiye nthomatoma ya nzeru,[1] mbwenye mapupwe ambalulupisa nzeru pontho upangizi.

⁸Mwananga ikha khutu kuna upangizi wa babako, pontho leka khonda pifunziso pya mako.

⁹Thangwi pifunziso pyawo ntchipewu chachifumu mumsolo mwako, pontho mkufu wakubalika m'khosi mwako.

¹⁰Ngakhala anyakudawa anakunyengerera, mwananga, leka kwatika nawo.

¹¹Ngakhala iwo analonga kuti, “Tende tibisalire munthu kuti timphe! Penu tende tisose chadala anthu adidi!

¹²Ninga dziko ya anyakufa, ife tinati tiakhudyule amoyo, pontho ninga masiye, tinati tiakhudyule amumphu.

¹³Mfuma ya mtundu onsene, tinaigumana mbatidzaza nyumba zathu na pyakupokosera.

¹⁴Tendembo nafe pabodzi, tenepo tinagawana pyonsene pinaba ifepyo.”

¹⁵Mwananga, leka tewera anthu ninga enewa, leka fambambo na njira inafamba iwo.

¹⁶Iwo nkhabe nthontho na kuchita upandu tayu, pontho ndzidzi onsene iwo kwawo nkhuchuchisa chiropa basi.

¹⁷Nkhupupwa kuteyera mbalame msampha mwenemo iyo ili maso soo!

¹⁸Kumbachita anthu enewa nkhubisalira chiropa chawo chene, pontho nkhugonera mpeni.

¹⁹Enewa ndiye mamalisiro a anthu onsene akuganyali na kuba; umbava umbapokosera moyo wa anyakuuchita.

²⁰Nzeru ikuchemera m'misewu, iyo ikuchemera mwakugaluza fala m'misika;

²¹ikuchemera m'misewu mule muna kusokosera; m'misuwo ya mizinda nzeru ikulonga kuti:

²²“Anthu akupupwamwe! Munakhala mapupwe kufikirana lini? Anthu akusingiriramwe! Munaleka lini kusingirirako? Munaleka lini kuzonda udziwisi?

²³Imwe mbamudavesera kwene kukusumululani kwanga, ine mbidakupangani manyerezero anga, pontho mbidachitisa nzeru zanga kudziwika kuna imwe.

²⁴Ine ndakuchemerani, kwache imwe hamudandivesere tayu; ndakuthambidzirani mkono, kwache imwe hamudapiikhe konta tayu.

²⁵Imwe mwakhonda upangizi wanga onsene, pontho hamudafune tayu kuti ndikusumululeni.

²⁶Natenepo mungaona nyatwa, ndinakusekani, pontho ndinakusingirirani pyakugoswa pingakufikirani,

²⁷pyakugoswa pingabwera pana imwe ninga chonzi, nyatwa zingakutswairani ninga chivumbulu, pontho mungava kupha na kusanyika mumtima.

²⁸“Tenepo iwo anandichemera, kwache ine sinaatawira tayu. Iwo anandisaka-saka konsene kwene, kwache iwo hanandigumana tayu.

²⁹Thangwi iwo adazonda udziwisi, mbasankhula kukhonda gopa MBUYA,

³⁰thangwi iwo hadafune upangizi wanga tayu, mbapasa nkhodolo kuasumulula kwanga,

³¹iwo anati atambire pyathema iwo kupitambira, anabzimbirwa na pyakuipa pyawo.

³²Anthu akupupwa ambafa thangwi ya kukhonda nzeru; anthu akupupwa ambavungika thangwi ya kupithemba.

³³Mbwenye munthu anandiveserayo, anakoyiwa mwadidi, pontho anakhala pakupata okhonda chita mantha.”