Read cisena MIYAMBI 10 Bible Online

MIYAMBI 10 - cisena bible

MIYAMBI 10

¹Yeneyi ndi miyambi ya Solomoni: Mwana wanzeru ambachitisa babache kufamba na nthuku phaa, mbwenye mwana wakupupwa ambatsukwalisa mache.

²Mfuma yakugumanwa na njira zakuipa nkhabe ganyalisa tayu, mbwenye kulungama kumbapulumusa moyo wa munthu.

³MBUYA nkhabe tawirisa anyakulungama kutcherenga na njala tayu, mbwenye ambachitisa anyakuipa kukhonda gumana pinafuna iwo.

⁴Kukhala manja mbwee kumbadzesa utcherengi, mbwenye manja a basa ambafumisa munthu.

⁵Munthu wanzeru ambavuna mbewu zingatokota, mbwenye nyakugona pyache ndzidzi wakuvuna ambachitisa manyadzo.

⁶Anyakulungama kwawo nkhutambira mtsanzayiso, mbwenye nthonga imbabisala m'kanwa mwa nyakuipa.

⁷Anyakulungama ambakumbukwa ninga mtsanzayiso, mbwenye dzina ya nyakuipa inafudzika.

⁸Munthu wanzeru ambavera matongero, mbwenye pupwe wakulonga-longa ambavungika.

⁹Munthu wangwiro ambakhala pakupata, mbwenye nyakufamba njira zakupotoka ambafitikizwa.

¹⁰Kukunyula maso kumbadzesa nyatwa, mbwenye kusumulula mwakuwanga mtima kumbadzesa mtendere.[4]

¹¹Mulomo wa nyakulungama ndi mphuno ya madzi a moyo, mbwenye nthonga imbabisala m'kanwa mwa nyakuipa.

¹²Chizondi chimbalamusa mapoko-poko, mbwenye kufunana kumbafikhira pyakuipa pyonsene.

¹³Nzeru zimbagumanwa m'kanwa mwa nyakuvesa pinthu, mbwenye mtswamu umbakhalira kumsana kwa nyakukhonda kuva.

¹⁴Munthu wanzeru ambapigumanyira udziwisi, mbwenye mulomo wa pupwe umbadzesa kuvungika.

¹⁵Ufumi wa nyakufuma ndi mzinda wakutchingwa na mpanda, mbwenye utcherengi nkhuvungika kwa nyakutcherenga.

¹⁶Kupagalwi kwa anyakulungama kumbaadzesera moyo, mbwenye kupagalwi kwa anyakudawika kumbaadzesera pyakuipa.

¹⁷Nyakutambira uphungu ambafamba m'njira ya moyo, mbwenye anyakukhonda kusumululwa ambabauka.

¹⁸Nyakubisa chizondi chache weneyo ngwakunama, pontho nyakulonga mwanzache tsweda weneyo ndi pupwe.

¹⁹Kuinjipisa pyakulonga, pyakudawa nkhabe sowapo tayu, mbwenye nyanzeru ngule ambaphata mulomo wache.

²⁰Lulume ya nyakulungama ndi siliva wadidiletu, mbwenye manyerezero a anyakudawika ngapezi-pezi.

²¹Pifunziso pya anyakulungama pimbaganyalisa azinji, mbwenye mapupwe ambafa thangwi ya kusowa nzeru.

²²Mtsanzayiso wa MBUYA umbadzesa mfuma, pontho MBUYA nkhabe thimizapo pyakutsukwalisa pamfumako tayu.[5]

²³Nkhupupwa kukomerwa na kuchita pyakuipa, mbwenye munthu waudziwisi ambakomerwa na nzeru.

²⁴Pinthu pimbagopa nyakudawika ndiye pinafuna dzamgwera, mbwenye nyakulungama ambapaswa pimbakhumba iye,

²⁵Chonzi chingadza chimbatswaira anyakuipa onsene, mbwenye anyakulungama ambaimira dzololo kwenda na kwenda.

²⁶Leka kwata nyakupolola kukuphatira basa; iye anakuchitisa mano ako kuzirizwa mbakupasa nyatwa ninga utsi m'maso mwako.

²⁷Gopa MBUYA, tenepo unakhala na moyo wakulapha, mbwenye nyakudawika ambafa ndzidzi wache mbudzati kwana.

²⁸Chidikhiro cha munthu wadidi chimbamchitisa kukomerwa, mbwenye nyakudawika nkhabe chidikhiro tayu.

²⁹MBUYA ambatchinjiriza nyakulungama, mbwenye ambavunga anyakuchita pyakudawa.

³⁰Ndzidzi onsene munthu wakulungama anakhazikika, mbwenye nyakudawika nkhabe dzakhala m'dziko muno tayu.

³¹Nyakulungama ambalonga pyanzeru, mbwenye lulume yakulonga pyakupotoka inadedzwa.

³²Nyakulungama ambadziwa pinthu pyakuthema, mbwenye nyakudawika ndzidzi onsene ambalonga pyakupotoka.