Read cisena MIYAMBI 11 Bible Online

MIYAMBI 11 - cisena bible

MIYAMBI 11

¹MBUYA ambazonda midida yakunama, mbwenye ambakomerwa na midida yakuona.

²Munthu ananyada chinchino, anachitiswa manyadzo, mbwenye ntchinthu chanzeru kukhala wakupichepesa.

³Kuona mtima kwa anyakulungama kumbaatsogolera, mbwenye anthu okhonda nyindirika ambavungwa na kunama kwawo.

⁴Mfuma nkhabe dzaganyalisa munthu tayu pansiku yakutongwa mseru, mbwenye kulungama kumbapulumusa moyo wa munthu.

⁵Kulungama kwa anyakusowa chakupokanyisa kumbachitisa njirawo kuongoka, mbwenye anyakudawika ambagwiswa na kudawika kwawo.

⁶Kulungama kwa anthu adidi kumbaapulumusa, mbwenye anyakukhonda khulupirika ambakweshwa na pikhumbo pyawo pyakuipa.

⁷Nyakudawika angafa, chidikhiro chache chimbafa naye pabodzi; pyonsene pikhadikhira iye kubulukira kuna mphamvu zache pyamala kwenda m'madzi.

⁸Nyakulungama ambapulumuswa panyatwa; mbwenye nyatwazo zimbagwera nyakudawika.

⁹Mafala a nyakukhonda tsalakana pya Mulungu ambavunga tsanthembache, mbwenye nzeru zimbachitisa nyakulungama kupulumuka.

¹⁰Mzinda umbakomerwa anyakulungama pinthu pyawo pingaafambira mwadidi, pontho kumbakhala kusekera kukulu anyakudawika angafa.

¹¹Mzinda umbakula anyakulungama angautsanzayisa, mbwenye mafala a anyakudawika ambagomola mzinda.

¹²Nyakutikana tsanthembacheyo ngwakusowa nzeru, mbwenye munthu wanzeru ambakhala pyache mulomo phoo.

¹³Nyatsweda ambapitisa pinthu mphepo, mbwenye munthu wakunyindirika ambakoya chinsisi.

¹⁴Dzinza imbagwa ngakhala nkhabe msolo wanzeru, mbwenye mapungu azinji ambachitisa kukhala pamtendere.

¹⁵Nyakuimirira mlendo mangawache anasanyika ndiye ene, mbwenye nyakuzonda pinyolo ambakhala pamtendere.

¹⁶Mkazi wakukoma mtima ambalemedzwa, mbwenye mamuna wa vinga ambaganyali kwene mfuma basi.

¹⁷Nyakukoma mtima ambaganyali pinthu pyadidi, mbwenye nyakukala mtima ambapidzesera yekha ene nyatwa.

¹⁸Nyakudawika kwache nkhunyengezwa kwene, mbwenye nyakubzala pyakulungama wache ndi mfupo chadi-chadi.

¹⁹Nyakukakamira chilungamo anakhala na moyo, mbwenye nyakukakamira kuchita pyakudawayo anafa.

²⁰MBUYA ambanyansirwa na anthu a manyerezero akupotoka, mbwenye ambakomerwa na makhaliro akusowa chakuapokanyisa.

²¹Iwe wathema kupidziwadi kuti: nyakudawika anati atchunyuswe, mbwenye anyakulungama anati apulumuke.

²²Ninga mphete yagolidi m'mphuno mwa nkhumba ndi sasawambo na mkazi wakubalika wakusowa nzeru.

²³Pikhumbo pya nyakulungama mamalisiro ache ngudidi, mbwenye chidikhiro cha nyakudawika mamalisiro ache ngukali.

²⁴Unango ngwakufewa pyache manja, kwache ndiye ambanyanya kufuma, unangombo ndi nkhunguni, kwache ndiye ambanyanya kutcherenga.

²⁵Munthu wakufewa manja pinthu pyache pimbamfambira mwadidi; nyakuphedza anthu anango anaphedzwambo.

²⁶Anthu ambatemberera munthu ule ambabisa mapirache kuti aganyali nawo, mbwenye ambatsanzayisa nyakugulisa mapirache pandzidzi wache.

²⁷Nyakusaka-saka udidi, anati akomerwe mtima, mbwenye pyakuipa pimbadzambo kuna nyakupisaka-sakayo.

²⁸Anyakunyindira mfuma anaunyala, mbwenye anyakulungama anabiriwira ninga masamba awisi.

²⁹Nyakudzesa nyatwa kuna banjache anayeswa mbaliro yakunja, pontho pupwe anakhala nyabasa wa munthu wanzeru.

³⁰Makhaliro akulungama akhala ninga muti wakupasa moyo, mbwenye kukhonda vera mwambo kumbapokosera moyo.

³¹Ngakhala nyakulungama ambatambira pinthu pyakumthemera pansi pano, apo nditani na nyakuipa mtima pontho nyakudawa.