Read cisena MIYAMBI 12 Bible Online

MIYAMBI 12 - cisena bible

MIYAMBI 12

¹Nyakutawira kulangwa ambafuna nzeru, mbwenye nkhupupwa kuzondana na kusumululwa.

²MBUYA ambakomerwa na munthu wadidi, mbwenye iye ambachitisa nyakusasanya kuchita pyakuipa kukonwa.

³Munthu nkhabe likha tayu pakuchita pyakuipa, mbwenye nyakulungama akhala ninga muti wakulikha.

⁴Mkazi wadidi ambakhala ninga chipewu chachifumu kuna mamunache, mbwenye mkazi wakumchitisa manyadzo akhala ninga utenda wa kasipa wa m'magogodo mwache.

⁵Manyerezero a anyakulungama ngakuona, mbwenye uphungu wa anyakudawika ngwakuphata nawo anthu m'maso.

⁶Mafala a anyakudawika ngaupandu, mbwenye malongero a nyakulungama ambapulumusa anthu.

⁷Anyakudawika ambaponyerwa kunja mbakhonda onekave, mbwenye banja ya anyakulungama imbakhazikika.

⁸Munthu ambasimbwa malingana na nzeru zina iye, mbwenye anthu a manyerezero akupotoka ambalulupiswa.

⁹Mphyadidi kukhala munthu ene pyako mbupha pinthu pyako na manjako, kusiyana na kupithemba ninga nyapyachembo mwenemo ukugona na njala.

¹⁰Munthu wadidi ambatsalakana mwadidi pifuyo pyache, mbwenye kukoma mtima kwa nyakuipa nkhukala mtima basi.

¹¹Nyakulima wakuphata basa m'munda mwache ambakhala na phoso izinji, mbwenye nkhupupwa kutaya ndzidzi na mabasa apezi-pezi.

¹²Nsanja yamphamvu ya nyakudawika imbavungika, mbwenye maziko a nyakulungama ambakhazikika.

¹³Nyakudawika ambakweshwa na malongero ache akuipa onthowo, mbwenye nyakulungama ambapulumuka panyatwa.

¹⁴Kubulukira pa mafalache adidi munthu ambatambira pinthu pyadidi; ninga mumbachitira manjache kumfupa thangwi ya mabasache.

¹⁵Pimbachita pupwe pimbaoneka ninga mphyadidi m'maso mwache, mbwenye munthu wanzeru ambavesera uphungu unapaswa iyewo.

¹⁶Pupwe ambaoneseratu kuzhangali kwache kabodzi kene, mbwenye munthu wanzeru angatikanwa nkhabe kupiikha konta tayu.

¹⁷Nyakulonga pyakuonadi ambapereka umboni wakuona, mbwenye nyakunama ambaperekambo umboni wakunama.

¹⁸Mafala a nyamphotcho-photcho ambalasa ninga talasada, mbwenye lulume ya munthu wanzeru imbawangisa.

¹⁹Mafala akuonadi ambakhala kwenda na kwenda, mbwenye kunama nkhabe kwata ndzidzi tayu.

²⁰Mumtima mwa anyakusasanya kuchita pyakuipa mumbakhala chiphamaso, mbwenye kukomerwa kumbakhala kuna anyakufuna mtendere.

²¹Nkhabe chakugoswa chinafuna dzagwera anyakulungama, mbwenye anyakudawika zawo ndi nyatwa zene basi.

²²MBUYA ambanyansirwa na kanwa yakunama, mbwenye ambakomerwa na anyakulonga pyakuonadi.

²³Nyakuchenjera nkhabe kupionesera tayu kuti ana udziwisi, mbwenye pupwe ambaonesa pakwecha kupupwa kwache.

²⁴Manja a basa anakhala na utongi, mbwenye kupolola mamalisiro ache nkhukhala bitchu.

²⁵Kutsukwala mumtima mwa munthu kwakhala ninga mtolo kuna iye, mbwenye mafala adidi anakwanisa kumgalamusa.

²⁶Nyakulungama ambaonesa njira shamwaliache,[6] mbwenye njira za anyakudawika zimbaaendesa m'tsanga.

²⁷Nyakukhulisa wakupolola nkhabe na kuotcha kwene nyama yapha iye tayu, mbwenye munthu wa manja a basa ambagumana mfuma ikulu.

²⁸Njira yakulungama imbaendesa kumoyo; mbwenye njira yakudawika imbaendesa kuimfa.