Read cisena MIYAMBI 13 Bible Online

MIYAMBI 13 - cisena bible

MIYAMBI 13

¹Mwana wanzeru ambavera uphungu wa babache, mbwenye nyakusingirira nkhabe tawira kusumululwa tayu.

²Kubulukira pa mafalache adidi munthu ambakomerwa na pinthu pyadidi, mbwenye mphandu ambakhala dyokodyoko kufuna kuchita nthonga.

³Nyakuchita mphole-mphole na malongero ache ambatchinjiriza moyo wache, mbwenye nyakulonga nyamphotcho-photcho anavungika.

⁴Nyakupolola ambakhumba chinthu mbakhonda kuchigumana, mbwenye anthu a manja a basa pinthu pyawo pimbaafambira mwadidi.

⁵Nyakulungama ambazonda pyakunama, mbwenye makhaliro a nyakudawika ambachitisa manyadzo pontho kululupisa.

⁶Kulungama kumbatchinjiriza munthu wakuona mtima, mbwenye kudawika kumbavunga anyakudawa.

⁷Munthu unango ambapisangiza nyamfuma, mwenemo iye nkhabe na chinthu chene tayu; unango ambapisangiza nyakutcherenga, kwache iye ana mfuma izinji.

⁸Mfuma ya munthu inakwanisa kuombola moyo wache, mbwenye nyakutcherenga nkhabe kuva kuthuswa tayu.

⁹Cheza cha anyakulungama chimbagaka pyakwanga, mbwenye nyale ya anyakuipa yakhala ninga nsakali yakupuchira.

¹⁰Kutumbama kumbabala mapoko-poko, mbwenye nzeru zimbagumanwa muna anyakuva uphungu.

¹¹Kobiri zakukhonda kuzibulusira kaluma zimbamala chiluwiluwi, mbwenye ungachita mwadiya umbadzala na makhonyo unafuma.

¹²Chidikhiro chingachita nthontho mtima umbapha, mbwenye pikhumbo pingakwana-kwana pimbakhala ninga muti wakupasa moyo.

¹³Nyakutikana uphungu ambapidzesera yekha ene nyatwa, mbwenye nyakuvera matongero ambafupwa.

¹⁴Chifunziso cha munthu wanzeru ndi mphuno ya madzi akupasa moyo, kubulusa munthu pamsampha wa imfa.

¹⁵Nzeru zimbachitisa kukomerwa mtima, mbwenye njira ya anyakukhonda khulupirika njamakolong'ondo.

¹⁶Nyakuchenjera ambachita pinthu pyonsene mwanzeru, mbwenye pupwe ambaoneseratu pakwecha kupupwa kwache.

¹⁷Nyamphangwa wakudawika ambadzesa nyatwa, mbwenye nyamphangwa wakunyindirika ambadzesa mtendere.

¹⁸Nyakukhonda kusumululwa wache ngutcherengi na manyadzo basi, mbwenye nyakutawira kusumululwa ambalemedzwa.

¹⁹Pikhumbo pingakwana-kwana pimbachitisa moyo kuva kutapira, mbwenye mapupwe nkhabe funa kusiya pyakuipa pyawo tayu.

²⁰Nyakufamba na anthu anzeru ambakhalambo nyanzeru, mbwenye nyakuchita ushamwali na mapupwe anavungika.

²¹Dzedze imbatewera nyakudawa, mbwenye kufamba mwadidi kwa pinthu ndi mfupo wa anyakulungama.

²²Munthu wadidi ambasiyira pidzukulu pyache mfuma, mbwenye mfuma ya anyakuipa inaenda kuna anyakulungama.

²³Minda ya anyakutcherenga inakwanisa kupha phoso izinji, mbwenye anyakusowa chilungamo ambadza mbaabera pyonsene.

²⁴Ule ambakhonda kwapula mwanache nkhabe kumfuna tayu, mbwenye nyakumfuna mwanache nkhabe nthontho na kumtchunyusa.

²⁵Anyakulungama ambadya mbakhuta, mbwenye kumimba kwa anyakudawika kumbakhala kade-kade.