Read cisena MIYAMBI 14 Bible Online

MIYAMBI 14 - cisena bible

MIYAMBI 14

¹Mkazi wanzeru ambamanga banjache, mbwenye na manjache mkazi wakupupwa ambafudza banjache.

²Nyamakhaliro akulungama ambagopa MBUYA, mbwenye munthu wa mtima wanyoka ambalulupisa MBUYA.

³Malongero a pupwe ambamkwapulisa yekha ene, mbwenye mafala a munthu wanzeru ambamtchinjiriza.

⁴Kusowa ng'ombe zakulima, pikwa nkhabe dzala tayu, mbwenye zingakhalapo pikwapyo pinati pidzale phamu-phamu na mapira.

⁵Mboni yakuona nkhabe chiphamaso tayu, mbwenye mboni yakunama, kunama nkhudya kwache.

⁶Anyakusingirira ambasaka-saka nzeru, kwache nkhabe kuzigumana, mbwenye zimbadza mwakukhonda nensa kuna anyaudziwisi.

⁷Funduka kutali na pupwe, thangwi iwe nkhabe dzagumana nzeru na pinalonga iyepyo.

⁸Nzeru za anyakuchenjera zimbafungula maso, mbwenye mapupwe ambanyengezwa na kupupwa kwawo.

⁹Mapupwe nkhabe pinthu na kutawira kudawa kwawo, mbwenye kufunirana udidi kumbagumanwa muna anyakulungama.

¹⁰Mtima onsene umbadziwa kuva kwache kupha, nkhabe munthu anakwanisa kugawana na mwanzache tayu kukomerwa kwa mtimache.

¹¹Nyumba ya nyakuipa inagomolwa, mbwenye khumbi ya nyakulungama inakhazikika.

¹²Pana njira inango, ile imbaoneka yadidi kuna munthu, kwache mamalisiro ache imbamuendesa kuimfa.

¹³Podi pale pene pana kuseka mtima unakwanisa basi kutsukwala, pontho kukomerwa mamalisiro ache anakwanisa kukhala kutsukwala.

¹⁴Nyakuipa anatambira pyakuthemerana na makhaliro ache, mbwenye munthu wadidi anafupwa thangwi ya mabasache.

¹⁵Pupwe ambakhulupira pyache chinthu chonsene, mbwenye munthu wakuchenjera ambayang'ana mafambiro ache.

¹⁶Munthu wanzeru ambagopa MBUYA mbathunda pyakuipa, mbwenye pupwe ambatundukira pinthu mbachita mwamphwayo.

¹⁷Nyachipsu ambachita pinthu pyakupupwa, pontho mpheswe ambazondiwa.

¹⁸Pupwe ambatambirambo pinthu pyakupupwa, mbwenye nyakuchenjera ambavazikwa chipewu cha udziwisi.

¹⁹Anyakudawika analamba pamaso pa anthu adidi, pontho anyakudawika anagodama pamsuwo wa anyakulungama.

²⁰Anyakutcherenga ambachalirwa podi na atsanthembawo ene, mbwenye anyakufuma ana ashamwali azinji.

²¹Nyakululupisa mwanzache adawa, mbwenye nyakutsanzaya ngule ambakomera mtima anyakutcherenga.

²²Anyakusasanya kuchita pyakuipa ambabauka kwenda m'tsanga, mbwenye anyakuchita pyadidi ambafunwa pontho ambanyindirwa.

²³Kuphata basa mwakuwangisa kumbaganyalisa, mbwenye kukhalira kulonga-longa kwene kumbadzesa utcherengi.

²⁴Mfuma ya anyanzeru ntchipewu chawo chachifumu, mbwenye mapupwe ambadziwika na kupupwa kwawo.

²⁵Mboni yakuona imbapulumusa moyo, mbwenye mboni yakunama njakuphesa.

²⁶Nyakugopa MBUYA ali mumpanda wamphamvu, pontho anache anakhala pakupata.

²⁷Kugopa MBUYA ndi mphuno ya madzi akupasa moyo, kupulumusa munthu kumsampha wa imfa.

²⁸Demelero ya mfumu yagona pa kuinjipa kwa anthu ambatonga iye kusowa anthu iye nkhabe basa tayu.

²⁹Munthu wakuuphata mtima ambakhala na udziwisi ukulu, mbwenye nyachipsu ambaonesa kupupwa kwachita iye.

³⁰Mtendere wa mumtima umbachitisa manungo kukhala na moyo, mbwenye bivu imbakhala ninga utenda wa kasipa.

³¹Kupondereza anyakutcherenga nkhutikana Nyakualenga, mbwenye kukomera mtima anyakusowa nkhulemedza Mulungu.

³²Anyakudawa ambavungika thangwi ya kudawika kwawo,[7] mbwenye anyakulungama ambakhala pakupata thangwi ya kuona mtima kwawo.

³³Nzeru zili m'manyerezero a nyaudziwisi, mbwenye muna mapupwe nzeru nkhabe gumanwa tayu.

³⁴Kuchita pyakulungama kumbachitisa dzinza kukhala yakuveka; mbwenye kudawa kumbachitisa anthu manyadzo.

³⁵Mfumu ambakomerwa na nyabasa wanzeru, mbwenye nyabasa wakuchitisa manyadzo ambalamusa ukali wache.