Read cisena MIYAMBI 15 Bible Online

MIYAMBI 15 - cisena bible

MIYAMBI 15

¹Kutawira mwakufulika kumbamalisa shungu, mbwenye mafala a mkaka uwawi ambalamusa ukali.

²Nyanzeru angalonga, udidi wa nzeru umbadziwika, mbwenye mulomo wa pupwe umbabwebweta pyakupupwa.

³Maso a MBUYA ali ponsene pene, kuikha maso pana anthu adidi na akuipa ene.

⁴Mafala adidi ambakhala ninga muti wakupasa moyo, mbwenye mafala akupotoka ambasanyisa mzimu wa munthu.

⁵Pupwe ambalulupisa upangizi wa babache; mbwenye kutawira kusumululwa kumbaonesa kuchenjera.

⁶Nyumba ya nyakulungama imbadzala na mfuma, mbwenye mfuma ya nyakudawika imbamdzesera nyatwa.

⁷Mulomo wa anyanzeru umbavekesa nzeru, mbwenye si tenepo tayu na mapupwe.

⁸MBUYA ambanyansirwa na nsembe za anyakudawika, mbwenye kupemphera kwa anyakulungama kumbamkomera.

⁹MBUYA ambanyansirwa na makhaliro a nyakudawika, mbwenye ambafuna nyakuchita pyakulungama.

¹⁰Ngakhala unabauka panjira yadidi unatchunyuswa pikulu pene, iwe unati ufe ungakhonda tawira kusumululwa.

¹¹Ngakhala dziko ya anyakufa na masiye pili pakwecha pamaso pa MBUYA, apo ndi tani na mtima wa munthu.

¹²Nyakusingirira nkhabe funa kusumululwa tayu; iye nkhabe vunza nzeru kuna anyakupidziwa.

¹³Mtima ungakomerwa na nkhope enembo imbagalamuka, mbwenye kuva kupha mumtima kumbasanyisa mzimu wa munthu.

¹⁴Nyakuvesa pinthu ambasaka-saka udziwisi, mbwenye pupwe kudya kwache nkhuchita pyakupupwa basi.

¹⁵Nyakuponderezwa moyo wache onsene ngwabenda-benda, mbwenye mtima wakukomerwa ndi sasawa na kuchita phwando ndzidzi onsene.

¹⁶Mphyadidi kukhala mtcherengi mbugopa MBUYA, kusiyana na kukhala nyakufuma mbukhala pa nyatwa.

¹⁷Mphyadidi kudya therere pale pana kufunana, kusiyana na kudya nyama yakununa pale pana chizondi.

¹⁸Nyachipsu ambalamusa mapoko-poko, mbwenye nyakuuphata mtima ambadzesa mtendere.

¹⁹Njira ya nyakupolola njakuphopha na ntcheswa, mbwenye njira ya nyakulungama njamyaa.

²⁰Mwana wanzeru ambachitisa babache kukomerwa, mbwenye pupwe ambalulupisa mache.

²¹Pupwe ambakomerwa na upupwe, mbwenye nyakuvesa pinthu ambachita pyakulungama.

²²Kusowa uphungu pinthu nkhabe famba mwadidi tayu, mbwenye mapungu azinji ambachitisa munthu kupikwanisa.

²³Munthu ambakomerwa na kutawira kwadidi, mafala akuthema akulongwa pandzidzi wache ngakukoma pyakwanga.

²⁴Anthu anzeru ambafamba na njira yakwendera ku moyo, kuti aleke bidira kudziko ya anyakufa.

²⁵MBUYA ambagomola nyumba za anyakugaya, mbwenye ambatchinjiriza madire a akazi akufelwa.

²⁶MBUYA ambanyansirwa na manyerezero a anyakuipa, mbwenye ambakomerwa na mafala a angwiro.

²⁷Nyamtima ambadzesa nyatwa pabanja pache, mbwenye nyakukhonda kudyekerwa anakhala na moyo wakulapha.

²⁸Nyakulungama ambatoma kunyerezera adzati tawira, mbwenye mulomo wa nyakudawika umbabwebweta pyakuipa.

²⁹MBUYA ambakhala kutali na nyakudawika, mbwenye nyakulungama angapemphera, iye ambavesera,

³⁰Nkhope zakusekera zimbadzesa kukomerwa mumtima, pontho mphangwa zadidi zimbapasa manungo mphamvu.

³¹Nyakuikha khutu kuna kusumululwa kwakuthema, penepo anakhala pakati pa anyanzeru.

³²Nyakukhonda kutchunyuswa akupikuwaza yekha ene, mbwenye nyakutawira kusumululwa, anakhala na udziwisi.

³³Kugopa MBUYA kumbafunzisa munthu kukhala na nzeru, pontho chilemedzo chimbadza m'nduli mwa kupichepesa.