Read cisena MIYAMBI 16 Bible Online

MIYAMBI 16 - cisena bible

MIYAMBI 16

¹Munthu anakwanisa kunyerezera pinthu mumtima mwache, mbwenye kutawira kwakuthema kumbabulukira kuna MBUYA.

²Makhaliro a munthu ambaoneka ninga akulungama kuna iye, mbwenye MBUYA ndiye ambapima pya mumtima.

³Ikha m'manja mwa MBUYA pyonsene pinachita iwe tenepo pyonsene pinasasanya iwe kupichita pinakwanisika.

⁴Chinthu chonsene chasasanya MBUYA china mamalisiro ache; tenepo mamalisiro a anyakudawika nkhuvungika.

⁵MBUYA ambanyansirwa na anyakugaya onsene, ndimomwene, iye nkhabe dzathawa kutchunyuswa tayu.

⁶Kudzera muna kukhulupirika na kupipereka pyakudawa pinalekererwa, pontho kugopa MBUYA kumbachitisa munthu kuthunda pyakuipa.

⁷Ngakhala makhaliro a munthu ngakukomera MBUYA, iye anachitisa[8] podi na anyamalwache ene kukhala naye pamtendere.

⁸Mphyadidi kukhala na pyakuchepa pyakupigumana mwakuona, kusiyana na kukhala na pizinji pyakugumanwa mwakuba.

⁹Munthu anakwanisa kusasanya pinafuna iye kuchita, mbwenye Mulungu ndiye ambaongolera manyalo ache.

¹⁰Mfumu ambalonga na utongi ukulu, tenepo pimbalonga iye mbipileke potoza chilungamo.

¹¹MBUYA ambafuna midida na miyezo yakuona, iye ambafuna kuona mtima pamalonda.

¹²Mafumu ambanyansirwa na kuchita pyakuipa,[9] thangwi chilungamo ndiye chimbachitisa ufumu kukhazikika.

¹³Mfumu kwache nkhufuna kulonga pyakuonadi, tenepo anamkomera mtima munthu wakulonga pyakuonadiyo.

¹⁴Ukali kwa mfumu wakhala ninga nyamphangwa wa imfa; mbwenye munthu wanzeru anaumbombowesa.

¹⁵Nkhope yakusekera ya mfumu imbadzesa moyo; kukoma kwache mtima kwakhala ninga makole a mvula.

¹⁶Ntchinthu chadidi kukhala na nzeru kusiyana na golidi; kusankhula udziwisi nkhwakufunika kupiringana siliva.

¹⁷Njira yatawa ya nyakulungama imbamchitisa kuthunda pyakuipa; nyakuchita mphole-mphole na mafambiro ache anakhala na moyo.

¹⁸Kunyada kumbavungisa munthu, pontho kugaya kumbachitisa munthu kugwa.

¹⁹Mphyadidi kupichepesa pontho kukhala pakati pa anyakusowa, kusiyana na kugawana nawo mfuma idapokosera anyakugaya.

²⁰Nyakuikha khutu kuna upangizi pinthu pyache pimbamfambira mwadidi, pontho nyakutsanzaya ngule ambanyindira MBUYA.

²¹Munthu wanzeru ambadziwika na kuvesa kwache pinthu; mafala akukoma ambathimizira anthu udziwisi.

²²Nzeru ndi mphuno ya madzi akupasa moyo kuna nyanzeru, mbwenye kupupwa kumbadzesa kutchunyuswa kuna pupwe.

²³Munthu wanzeru ambachita mphole-mphole na malongero ache; pimbalonga iyepyo pimbathimizira anthu udziwisi.

²⁴Mafala akukoma akhala ninga manyuchi, akuchitisa moyo kuva kutapira, pontho kupasa manungo mphamvu.

²⁵Pana njira inango, ile imbaoneka yadidi kuna munthu, kwache mamalisiro ache imbamuendesa kuimfa.

²⁶Maba a nyabasa ambampasa phinga kuphata basa, thangwi ambafuna kupha njala ina iyeyo.

²⁷Munthu wakusowa basa ambasasanya kuchita pyakuipa, pontho malongero ache akhala ninga lupya.

²⁸Nyakupotoka manyerezero ambalamusa mapoko-poko, pontho tsweda imbamenyanisa ashamwali misolo.

²⁹Munthu wakuzunguza ambanyengeza ashamwali mbaachitisa kwenda na njira zakuipa.

³⁰Nyakukunyula maso ambasasanya kuchita pyakupotoka; nyakupidula ambasasanya kuchita pyakuipa.

³¹Imvi ntchipewu chachifumu cha demelero; ndi mfupo wa munthu wa makhaliro akulungama.

³²Mphyadidi kukhala nyakusowa chipsu kusiyana na kukhala nyankhondo; mphyadidi kukhala nyakuuphata mtima kusiyana na nyakupokosera mzinda.

³³Anthu ambachita ntsango kufuna kudziwa pyakuchitika, mbwenye MBUYA ene ndiye ambapitchulula.