Read cisena MIYAMBI 17 Bible Online

MIYAMBI 17 - cisena bible

MIYAMBI 17

¹Mphyadidi kububuludza mkhutche pale pana mtendere, kusiyana na kudya phwando m'nyumba mule muna mapoko-poko.

²Bitchu wanzeru anakhala na utongi pana mwana wakuchitisa manyadzo wa mbuyache, mbasiyirwa khundu inango ya mfumayo ninga mwana wa m'banjamo.

³Golidi na siliva pimbanyunguluswa na moto kubulusa masepu-sepu; mbwenye mtima wa munthu umbayeswa na MBUYA.

⁴Munthu wakuipa ambavesera m'kanwa mwakuvunda, pontho nyakunama ambaikha khutu kuna nyampeni walezi.

⁵Nyakusingirira anyakutcherenga ambatikana Nyakualenga, pontho nyakukomerwa na dzedze ile yakwata munthu unango anati atchunyuswe.

⁶Pidzukulu ntchipewu chachifumu cha nkhalamba, pontho ana ambanyadira makolo awo.

⁷Ngakhala mafala adidi nkhabe kuthemera mapupwe, apo ndi tani na mafala akunama akubulukira m'kanwa mwa mfumu.

⁸Anthu anango ambanyerezera kuti kudyekera kwakhala ninga mchena; kuti ipyo pinakwanisa kuchitisa pyonsene kuafambira mwadidi.

⁹Nyakulekerera pyakudawa pya mwanzache ambafuna mtendere, mbwenye nyakupikumbusira ambaphadzanisa ashamwali.

¹⁰Nyaudziwisi ambatawira kusumululwa kabodzi kusiyana na mitswamu khumi na kumanyalo kukwapula nayo pupwe.

¹¹Nyakudawika ambalamusa pyakupandukira; nyamphangwa wakukala mtima anatumwa kuna iye.

¹²Mphyadidi kugumanikana na mbidzi wakuberwa anache, kusiyana na pupwe wakudzudzumika na kupupwa kwache.

¹³Ngakhala munthu anabwezera chakuipa pa chadidi, pyakuipa nkhabe dzabuluka m'nyumba mwache tayu.

¹⁴Kulamusa mapoko-poko kwakhala ninga kubaula thawale, matama pyako pinthu mbapidzati ndendeya.

¹⁵Kukomesa nyakudawa pamseru, penu kuchitisa nyakukhonda dawa kukonwa, pyonsene piwiripi MBUYA ambanyansirwa napyo.

¹⁶Thangwi yache ninji pupwe apaswe kobiri kuti afunze nazo, mwenemo iye nkhabe chikhumbo chakugumana nzeru.

¹⁷Ashamwali ndzidzi onsene ambaonesa kufunana kwawo, pontho mbaleako adabalwa kuti akuphedze pandzidzi wa nyatwa.

¹⁸Nyakusowa nzeru ambapereka pinyolo, mbaimirira tsanthembache mangawa.

¹⁹Kufuna kuchita pyaumambala nkhufuna mapoko-poko, pontho nyakugaya[10] ndzidzi onsene ambapichemerera yekha ene nyatwa.

²⁰Nyakupotoka manyerezero pinthu pyache nkhabe kumfambira mwadidi tayu; nyachiphamaso ambagwa panyatwa.

²¹Mwana wakupupwa ambatsukwalisa babache; baba ule ana mwana wakupupwa nkhabe komerwa tayu.

²²Mtima wakukomerwa wakhala ninga mtombwe wadidi, mbwenye kusanyiswa kwa mzimu wa munthu kumbayamwa chiropa.

²³Nyakudawika ambatawira kudyekerwa chibiso-biso, towera apotoze chilungamo.

²⁴Nyaudziwisi ambaikha mtima panzeru, mbwenye pupwe ambamwaza-mwaza maso mpakana kumadolomero a dziko.

²⁵Mwana wakupupwa ambatsukwalisa babache mbaphesa mtima mache nyakumbala.

²⁶Si pyadidi tayu kutchunyusa anthu okhonda dawa, penu kukwapula anthu akuona mtima.

²⁷Munthu wanzeru nkhabe chitcheperepe, pontho nyaudziwisi nkhabe chipsu tayu.

²⁸Podi pupwe ene ambaoneka ninga wanzeru angakhala pyache mulomo phoo; ambaoneka nyaudziwisi iye angamatama pyache.