Read cisena MIYAMBI 18 Bible Online

MIYAMBI 18 - cisena bible

MIYAMBI 18

¹Munthu okhonda phatizana na anzache ngwakutsalakana pya yekha ene basi; iye ambapokanyisana na pyonsene pimbayesa anango pyanzeru.

²Pupwe nkhabe komerwa na kuvesa pinthu tayu, mbwenye ambakomerwa na kubwebweta pinanyerezera iye.

³Pale pana kudawika, kululupiswambo kuli ponthopo, pontho kutaya chilemedzo kumbadzesa manyadzo.

⁴Mafala a munthu wanzeru akhala ninga madzi a mumchera wakuzwika; phata ya nzeru yakhala ninga madzi a mumkulo wakukuka.

⁵Si pyadidi tayu kuikhira kunduli nyakudawa, penu kukhondesa nyakukhonda dawa kuchitirwa chilungamo.

⁶Mulomo wa pupwe umbadzesa mapoko-poko, pontho pakanwa pache pambamchemerera kumenywa.

⁷Pupwe angalonga akupivunga yekha ene, pontho ambakweshwa na mafalache onthowo.

⁸Tsweda imbakoma pyakwanga ninga chitumbuwa, anthu ambakomerwadi na kuikhudyula.

⁹Nyakupolola pabasa ndi mbaleache nyakuvunga.

¹⁰MBUYA akhala ninga nsanja yamphamvu; anyakulungama anakwanisa kuthawirako mbakhala pakupata.

¹¹Nyakufuma ambayesa mfumacheyo ninga mzinda wamphamvu, pontho ninga mpanda wakulapha kukwanisa kumtchinjiriza.

¹²Anthu akunyada ali panjira kwenda kavungika, mbwenye anyakupichepesa ali panjira kwenda kalemedzwa.

¹³Nyakutawira mbadzati toma vesera ambaonesa kupupwa kwache, pontho pinamchitisa manyadzo.

¹⁴Mzimu wa munthu umbapirira iye angadwala, mbwenye mzimu wa munthu ungasanyiswa mbani anakwanisa kupirira.

¹⁵Nyakuvesa pinthu ambagumana nzeru; makutu a nyanzeru ambasaka-saka udziwisi.

¹⁶Mtukwa umbafumbula njira kuna nyakuupereka, pontho umbamfikisa pamaso pa akulu-akulu.

¹⁷Nyakutoma kulonga pya mseru wache ambaoneka ninga wadidi, kufikirana mwanzache aimire kumvunza.

¹⁸Ntsango imbamalisa mphoka, imbalekesa mphoka ya anthu amphamvu.

¹⁹Mphyakunensa kusembedzera mbale wakudawirwa kusiyana na kupokosera mzinda wakutchingwa na mpanda; mapoko-poko ambalekanisa ninga misuwo yakufungwa na mphinga yasimbi.

²⁰Munthu anakwanisa kukhala na moyo kubulukira pa pinthu pimbalonga iye; iye ambakhutiswa na mafala a m'kanwa mwache.

²¹Lulume ina mphamvu kupulumusa moyo, penu kuuvunga; tenepo ale ambaifuna anadya nsapo zache.

²²Ule agumana mkazi agumana chinthu chadidi, pontho atambira kukoma mtima kwa MBUYA.

²³Nyakutcherenga ambadembetera nsisi, mbwenye nyakufuma ambatawira pyache nyamphotcho-photcho.

²⁴Pana ashamwali anango achiphamaso; mbwenye pana ashamwali anango ale ambakhala m'khundu kupiringana mbale ene.