Read cisena MIYAMBI 19 Bible Online

MIYAMBI 19 - cisena bible

MIYAMBI 19

¹Mphyadidi kukhala nyakutcherenga wakusowa chakupokanyisa kusiyana na kukhala pupwe wakulonga pyakupotoka.

²Phinga yakusowa nayo nzeru si pyadidi tayu, penu kuchita mchunju mbuphonya njira.

³Kupupwa kwa munthu kumbavunga moyo wache, angamala penepo mtimache umbazhangalira MBUYA.

⁴Mfuma imbachitisa kukhala na ashamwali azinji, mbwenye nyakutcherenga ashamwali ache ambamthawa.

⁵Mboni yakunama nkhabe dzathawa kutchunyuswa tayu, pontho nyakunama nkhabe dzayang'anwa kwene tayu.

⁶Azinji ambachita ndikome-ndikome kuna nyakufunika, pontho nyakufewa manja ndi shamwali wa munthu onsene.

⁷Ngakhala nyakutcherenga ambachalirwa na abale ache onsene, apo ndi tani na ashamwali ache? Podi kwene kuti iye ambaasembedzera, iwo nkhabe dzaoneka tayu.

⁸Nyakugumana nzeru ambafunadi moyo wache; nyakukomerwa na kuvesa pinthu, pyache pimbamfambira mwadidi.

⁹Mboni yakunama nkhabe dzathawa kutchunyuswa tayu, pontho nyakunama anavungika.

¹⁰Ngakhala si pyakuthema tayu pupwe kukhala pakutonthola, apo ndi tani na bitchu kutonga mafumu?

¹¹Nzeru zimbapasa munthu kupirira; demelero yache yagona pa kukhonda ikha konta kutikanwa.

¹²Ukali wa mfumu wakhala ninga kubangula kwa nkhalamu, mbwenye kukoma kwache mtima kwakhala ninga bume m'maudzu.

¹³Mwana wakupupwa ntchakuvunga kuna babache, pontho mkazi wamulomo akhala ninga nsoyi yakuchucha.

¹⁴Nyumba pontho mfuma mphinthu pyakusiyirwa na makolo, mbwenye mkazi wanzeru ambabulukira kuna MBUYA.

¹⁵Kupolola kumbachitisa munthu kuliza mkhonono, pontho nyakutonthola makhono ambagona na njala.

¹⁶Nyakuvera matongero a MBUYA anakhala na moyo, mbwenye nyakukhonda mwambo wache anati afe.

¹⁷Nyakupasa anyakutcherenga ambakoyesa kuna MBUYA, tenepo MBUYA anambwezera thangwi ya mabasache.

¹⁸Langa mwanako madzi mbali m'mabondo; ungakhonda kumtchunyusa, iye anavungikiratu.[11]

¹⁹Nyachipsu athema kuoneswa nyatwa; ngakhala unampulumusa, iwe unati upichite pontho.[12]

²⁰Ngakhala unavesera uphungu pontho upangizi, pakumalisa pache unati ukhale wanzeru.

²¹Munthu anakwanisa kunyerezera pinthu pyonsene pinafuna iye kuchita, mbwenye kufuna kwa MBUYA kunati kuchitike.

²²Ntchinthu chakukhumbika kuna munthu kukhala wakunyindirika;[13] kukhala nyakutcherenga mphyadidi kusiyana na nyakunama.

²³Kugopa MBUYA kumbadzesa moyo, kukhala pakupata, pontho kukhonda gwerwa na chakuipa.

²⁴Mpololi angamenya tchuwa, iye nkhabe kwanisa na kuifikisa kwene pamulomo pache tayu.

²⁵Kwapula nyakusingirira, penepo nyakufa msolo anadziwa kutonga pinthu mwadidi; sumulula nyakuvesa pinthu, tenepo iye anakhala na udziwisi.

²⁶Nyakubera babache, penu nyakuthamangisa mache ndi mwana wakuchitisa manyadzo, pontho wakululupisa.

²⁷Mwananga, ungakhonda vera upangizi, unati ukhale kutali na mafala audziwisi.

²⁸Mboni yakuipa imbapotoza chilungamo, pontho nyakudawika kunama nkhudya kwache.

²⁹Anyakusingirira kwawo nkhutchunyuswa basi, pontho mapupwe kwawo nkhukwapulwa kwene kumsana basi.