Read cisena MIYAMBI 2 Bible Online

MIYAMBI 2 - cisena bible

MIYAMBI 2

¹Mwananga, ikha mumtima pifunziso pyanga, pontho leka duwalira pinakupanga ine.

²Vesera mafala anzeru, pontho ikhira mtima udziwisi.

³Ngakhala unapempha kuvesa pinthu, penu kudembetera udziwisi;

⁴ngakhala iwe unapisaka-saka ninga siliva, penu ninga mfuma yakubisika,

⁵penepo unavesa kuti kugopa MBUYA nkhulonganji, pontho iwe unamdziwa Mulungu.

⁶Ndi MBUYA ule ambapasa nzeru; udziwisi pontho kuvesa pinthu pimbabulukira kuna iye.

⁷Iye ambaphedza anyakulungama kupikwanisa, pontho ntchakugedera matswimo kuna anyakusowa chakupokanyisa.

⁸Iye ambaonesesa kuti chilungamo chikuchitika mbayang'anira mwadidi anyakukhulupirikache.

⁹Penepo iwe unavesa kulungama, chilungamo, pontho kutonga mwakukhonda yang'ana nkhope, unadziwa pyathema iwe kupichita.

¹⁰Msolo wako unadzala na nzeru, pontho udziwisi unakuchitisa kukomerwa.

¹¹Kupitonga kwako pinthu mwadidi kunakutchinjiriza, pontho kuvesa pinthu kunakuyang'anira.

¹²Nzeru zinakupulumusa kuna njira zakuipa, kuna anthu akulonga mafala akufudza,

¹³ale ambasiya njira zakulungama kubaukira pyawo kunjira zamdima,

¹⁴anthu ambakomerwa pyawo na kuchita pyakuipa mbasekera na kuchita pyakupotoka ale,

¹⁵anthu ambachita pyaunthawatawa, pontho ale ana mtima wanyoka.

¹⁶Nzeru zinakupulumusa kuna mkazi wa makhaliro akudzedzeduka, kuna mkazi wakuchita pyauputa na mafalache akutapira,

¹⁷ule asiya mamunache wakukazhali naye, mbaduwalira kudumbira kudachita iye pamaso pa Mulungu kule.

¹⁸Ngakhala unaenda kumusa kwache, ukwenda kafa, thangwi kwenda kweneko ndi sasawa na kwenda kudziko ya anyakufa.

¹⁹Anyakwenda kuna mkazi weneyu nkhabe na mbodzi ene ambabwererako tayu, iwo nkhabe gumana pontho njira ya kumoyo tayu.

²⁰Natenepo iwe wathema kutewera njira za anthu adidi, pontho kukhala na makhaliro akulungama.

²¹Anthu akulungama anakhala m'dziko, anthu akusowa chakupokanyisa anathimiza kukhalamo,

²²mbwenye Mulungu anabulusa anyakudawika m'dzikomo, mbaatchikhula anyakukhonda khulupirika m'dzikomo.