Read cisena MIYAMBI 20 Bible Online

MIYAMBI 20 - cisena bible

MIYAMBI 20

¹Vinyu ngwakuselusa, pontho bwadwa umbalamusa nthonga; nyakubauswa na pyakuledzeresa nkhabe nzeru tayu.

²Ukali wa mfumu wakhala ninga kubangula kwa nkhalamu; nyakuusosa ambataya moyo wache.

³Kuthunda mapoko-poko ntchilemedzo kuna munthu, mbwenye pupwe ambafuna pyanthonga.

⁴Mpololi nkhabe lima mundache pandzidzi wache tayu; pandzidzi wakuvuna iye ambasaka-saka chakuvuna, kwache hambachigumana tayu.

⁵Manyerezero a munthu akhala ninga madzi mumchera wakuzwika, mbwenye nyaudziwisi ambatungamo madziwo.

⁶Anthu azinji ambapilonga kuti iwo mbanthu akunyindirika; mbwenye nyakukhulupirika mbani anakwanisa kumgumana?

⁷Nyakulungama ambakhala na moyo wakusowa chakupokanyisa; mbakutsanzaya anache ambatewera makhaliro ache ale.

⁸Mfumu angakhala pampando wache wakutongera miseru, ambapepeta pyakuipa pyonsene na maso ache.

⁹Mbani anakwanisa kulonga kuti, “Ine ndina moyo wangwiro; ndine wakuchena pontho wakusowa pyakudawa?”

¹⁰Midida yakunama na miyezo yakukhonda ona, MBUYA ambanyansirwa nayo.

¹¹Podi na mwana ene ambadziwika na mabasache; ngakhala makhaliro ache ngadidi pontho akulungama.

¹²Makutu ngakuva nawo pontho maso ngakuona nawo, MBUYA ndiye adasasanya pyonsene piwiripi.

¹³Leka komerwa na kugona kwene, gopesera unatcherenga; galamuka, tenepo unakhala na phoso pyakwanga.

¹⁴Nyakugula ambadirira mbati, “Pyaduladi! Pyaduladi!” Mbwenye angabuluka penepo ambaenda mbagaya thangwi ya kete-kete achita iyeyo.

¹⁵Golidi alipo, pontho miyala yakudula ili dala-dala, mbwenye milomo yakulonga udziwisi njakusowa pyakwanga.

¹⁶Kwata nguwo ya munthu ule adaimirira mlendo mangawache mbuiphatire pinyolo thangwi iye adapichita kuna nyakukhonda dziwika.

¹⁷Kudya kwakugumanwa mwakuba kumbatapira kuna munthu, mbwenye mamalisiro ache m'kanwa mwache mumbadzala na ntchangalabwe.

¹⁸Khala na upangizi wadidi papinthu pinasasanya iwe kuchita; leka kwenda kachita nkhondo mbudzati vunza mapungu.

¹⁹Nyatsweda ambapitisa pinthu mphepo, natenepo leka phatizana na nyachitcheperepe.

²⁰Munthu anatemberera babache na mache, moyo wache unathimiswa ninga nyale mumdima wa ndiwe ani.

²¹Nyakupifumisa yekha ene mwakuchimbiza, pakumalisira pache nkhabe dzatsanzayiswa tayu.

²²Leka kunyerezera pyakubwezera chakuipa. Nyindira MBUYA, iye anati akupulumuse.

²³MBUYA ambanyansirwa na midida yakunama, pontho na miyezo yakukhonda ona.

²⁴Mafambiro a munthu ambatsogolerwa na MBUYA, Apo munthu anakwanisa tani kuvesa mafambiro ache?

²⁵Ntchinthu chakugoswa kuchimbiza na kudumbira pamaso pa MBUYA, mbudzati kupinyerezera mwadidi.

²⁶Mfumu wanzeru ambapepeta anyakudawika, iye ambaapeya na chingolo chache.

²⁷Chikumbu mtima cha munthu chakhala ninga nyale ya MBUYA, chimbasakanyula monsene mwene mumtima wa munthu.

²⁸Kufunana na kukhulupirika kumbamchitisa mfumu kukhala pakupata; na chilungamo ufumu wache umbakhazikika.

²⁹Demelero ya uphale ndi mphamvu zawo; imvi ndiye demelero ya nkhalamba.

³⁰Mashoko na pironda pimbabulusa pyakuipa, pontho kukwapulwa ndiye kumbachenesa pya m'bwaloletu mwa munthu.